ملک دہشتگردی دے عذاب توں نکل تے ترقی اتے خوشحالی دے رستے تے ٹر پئے، صدر مملکت

اسلام آباد ۔ 4 جولائی (اے پی پی) صدر مملکت ممنون حسین آکھیے جو تاجر و صنعت کار قومی معیشت دی ترقی اتے ودھارے اچ بنیادی کردار رکھدن،ملک دہشتگردی دے عذاب توں نکل تے ترقی اتے خوشحالی دے رستے تے ٹر پئے اتے ملک اچ امن آونڑ نال معاشی صورتحال چنگی تھیندی پئی اے۔اے گال انہاں لاہور چیمبر آف کامرس اینڈ انڈسٹری ولوں سفارت کاراں دے اعزازاچ ہک عشائیے نال خطاب اچ کیتی۔انہاں آکھیے جو ملک دہشتگردی توں بچ نکلیے اتے ہنڑ ترقی اتے خوشحالی دے رستے تے ٹرداپئے،حکومتی پالیسیاں پاروں معیشت سنبھلی اے،وپار اتے سٹاک مارکیٹ اچ وی چنگائی ڈسدی پئی اے اتے سرمایہ کاراں دا وی اعتماد ودھیے۔انہاں پاکستانی اتے بیرونی سرمایہ کاراں تے زور ڈتے جو او پاکستان اچ ودھدے کاروباری مواقع توں فیدہ چاون۔انہاں لاہور چیمبر دے وطنِ عزیزاچ کم کرنڑآلی سفارتی برادری نال میل جول ، فعال اتے متحرک روابط دی تعریف کیتی۔