اسلام آباد ۔ 9 جولائی (اے پی پی) نگران وزیر اعظم جسٹس (ر) ناصر الملک نال واپڈا دے چیئرمین لیفٹیننٹ جنرل (ر) مزمل حسین ملاقات کیتی تے انہاں کوں ملک اچ پانڑیں تے بجلی دے شعبیں متعلق امور بارے بریفنگ ڈتی۔ وزیر اعظم کوں واپڈا دے منصوبیں خاص طور تے دیامر بھاشااتے مہمند ڈیماں بارے ڈسایا گیا۔ بریفنگ اچ ڈسایا گیا جو دیامر بھاشا ڈیم اتے مہمند ڈیم دے منصوبیں تے کم مالی سال 2018-19دے دوران شروع تھی ویسی ۔ دیامر بھاشا ڈیم اچ 8.1ملین ایکڑ فٹ پانڑیں ذخیرہ کرنڑ دی گنجائش ہوسی تے ایں منصوبے نال 4500میگاواٹ بجلی پیدا کرنڑ دی صلاحیت ہوسی ۔ایں طرح مہمند ڈیم ہائیڈرو پاور پراجیکٹ اچ 1.2ملین ایکڑ فٹ پانڑیں ذخیرہ کرنڑ دی گنجائش ہوسی جڈاں جو ایں منصوبے نال 800میگاواٹ بجلی وی بنڑائی ویسی ۔ایں طرح 1410 میگاواٹ پیداواری صلاحیت دا حامل تربیلا 5 توسیعی منصوبہ، 2160 میگاواٹ بجلی دی پیداوار دا منصوبہ داسو سٹیج ٹو، 7100میگاواٹ دا بونجی تے کرم تنگی ڈیم دا ڈوجھا مرحلہ تعمیر سانگے تیار منصوبیں اچ شامل ہن ۔چیئرمین واپڈا ملک اچ پانڑیں تے بجلی دیاں ودھدیاں ہویاں ضرورتاں کوں پورا کرنڑ سانگے واپڈا ولوں کیتیاں ونجنڑ آلیاں کوششاں کوں نشابر کریندے ہوئیں آکھیا جوواپڈا اگست 2017ءدے بعد توں ڈیرہ بگٹی اسلام آباد اچ72ہزار ایکڑ ازمین کوں پانڑیں فراہم کرنڑ تے 2487 میگاواٹ پن بجلی نیشنل گرڈ اچ شامل کرنڑ سانگے وڈے منصوبے پورے کر گھدن ۔ وزیرا عظم پانڑیں تے پن بجلی دے شعبیں اچ منصوبیں تے عمل در آمد دے سلسلے اچ واپڈا ولوں کیتے ونجنڑ آلے اقدامات تے اطمینان دا اظہار کیتے تے آکھیے جو ملک کوں پیش پانڑیں دے بحران تے قابو پاونڑ سانگے پکے اقدامات دی ضرورت اے ۔
