لندن ۔ 6 جولائی (اے پی پی) سابق وزیر اعظم محمد نوازشریف اتے انہاں دی دھی مریم نوازایون فیلڈ ریفرنس اچ نیب عدالت توں سزا دے فیصلے دے بعد کلثوم نواز دے ہوش اچ آندے ہی وطن واپسی دا فیصلہ کیتے ۔ اے اعلان انہاں نیب کورٹ فیصلے دے بعد جمعہ کوں لندن اچ مریم نواز دے نال پریس کانفرنس نال الیندے ہوئیں کیتا۔ انہاںآکھیا جو جیویں ہی میڈی ذال بیگم کلثوم نواز کوں ہوش آندے تاں میں انہاں کوں سلام دعا کر تے وطن لگیا ویساں ۔ ہک بئے سوال دے جواب اچ انہاں آکھیا جو میکوں ڈسایا ونجے جو میں کیہڑی کرپشن کیتی ہے، میں کیہڑا کمشن کھادے ۔ انہاں آکھیا جو اے گالھ سپریم کورٹ اچ وی ہک جج کیتی ہئی ۔ میاں نواز شریف آکھیاجو میں پاکستان ولیاوینداں اتے وکیلاں نال مشورے دے بعد آئین اتے قنون اچ حاصل حقوق استعمال کریساں ۔ میڈی خواہش ہے جو میں پاکستان ونجنڑ توں پہلے بیگم کلثوم نواز کوں دیکھے گھناں، انہاں نال کئی گالھ کرگھناں۔ روز ایں آس تے ہسپتال آنداں ہاں جو ہک واری کلثوم نواز ہوش اچ آونجن ۔ کلثوم نواز گزریل 47سال توں میڈی شریک حیات ہن ۔ ہک بئے سوال دے جواب اچ نواز شریف آکھیا جو مریم میڈے توں ودی ودھ پاکستان ونجنڑبے تاب ہے ۔ نواز شریف آکھیا جو میڈی کہیں وی درخواست کوں عدالت منظور کائنی کیتا۔ ہک سوال دے جواب اچ انہاں آکھیا جو پاکستان اچ کیہڑے صاف و شفاف الیکشن تھیندے ویندے ہن۔ انہاں آکھیا جو پاکستا ن اچ لوکیں دیاں وفاداریاں اتے ٹکٹاں تبدیل کروائیاں ویندیاں پن ۔ کون ہن او لک جنہاں اساڈے لوکیں دیاں وفاداریاں تبدیل کرواتے انہاں کوں آزاد کھڑا کر ڈتے یا تحریک انصاف اچ شامل کر ڈتے یا جیپ دے نشان ڈیوائے گن۔ ہک سوال دے جواب اچ انہاں آکھیا جو میکوں 1999اچ وی 14مہینے جیل اچ بند کرڈتاگیا ہئی ۔ میڈے کیتے قید دی سزا کئی نویں چیز کائنی ۔
