اسلام آباد ۔ 24 جولائی (اے پی پی) نگران وزیراعظم جسٹس (ر) ناصر الملک ملک اچ مقامی تے غیر ملکی سرمایہ کاری دے فروغ اتے پیش آونڑآلیاں رکاوٹاں کوں ہٹاونڑ سانگے وفاقی تے صوبائی حکومتاں، غیر ملکی مشنز اتے متعلقہ حلقیاں وچال تعاون کوں ودھاونڑ دی لوڑ تے زور ڈتا۔ انہاں اے گالھ منگل کوں وزیراعظم دفتر اچ سرمایہ کاری بورڈ بارے بریفنگ دی صدارت کریندے ہوئیں آکھی۔ وزیر خزانہ ڈاکٹر شمشاد اختر، سیکرٹری خزانہ عارف احمد خان، چیئرپرسن ایف بی آر رخسانہ یاسمین، سیکرٹری سرمایہ کاری بورڈ محمد جہانزیب خان، وزیراعظم دے ایڈیشنل سیکرٹری ڈاکٹر کاظم نیاز اتے بئے اعلیٰ حکام وی ایں موقعے تے موجود ہن ۔ سیکرٹری سرمایہ کاری بورڈ محمد جہانزیب خان وزیراعظم کوں ملک اچ مقامی تے غیر ملکی سرمایہ کاری دے فروغ، کاروباری برادری کوں سہولتاں ڈیونڑ ، قنون سازی اچ بہتری، سرمایہ کاری کو ںراغب کرنڑ کیتے نگرانی اتے پالیسی فریم ورک، کاروبار اچ سُکھ ڈیونڑ اتے نمایاں ادارے دی حیثیت نال سی پیک منصوبہ جات دے تحت صنعتی تعاون کوں ودھاونڑ اچ ادارے دے کردار بارے ڈسایا۔ انہاں آکھیا جو کجھ مسلیاں کوں حل کرنڑ کیتے کوششاں جاری ہن ، جنہاں نال ماضی اچ سرمایہ کاری دی تیز تر ترقی اتے کاروباری برادری دا اعتماد بحال کرنڑ دی راہ اچ رکاوٹ پیدا تھئی ۔ سی پیک دے تحت خصوصی اقتصادی زونز دے قیام اُتے اگوہیں دا وی جائزہ گھدا گیا۔
