اسلام آباد ۔ 5 جولائی (اے پی پی) پاکستان اچ ایران دے سفیرمہدی ہنردوست آکھیے جو پاکستان اتے ایران دے تعلقات تاریخی ، مذہبی اتے ثقافتی رشتیاں اچ جڑیے ہوئن، آونڑ آلے ویلھے اچ ڈوہاں ملکاں دے اے تعلقات بئے مضبوط تھیسن۔اے گالھ انہاں اسلام آباد اچ قومی خبر رساں ادارے ایسوسی ایٹیڈ پریس آف پاکستان دے ہیڈکوارٹرزدے دورے دے موقع تے ایم ڈی اے پی پی مسعود ملک نال گالھ مہاڑ اچ آکھی۔ ایں توں پہلے منیجنگ ڈائریکٹراے پی پی مسعودملک ایرانی سفیر کوں اے پی پی ہیڈکوارٹرزآونر تے خوش آمدیدی آکھیا ۔ انہاں مہمان کوں اے پی پی دے طریقہ کار،خبراں ، سمعی وبصری مواد دی سبسکرائیبرزتک فراہمی سانگے بریفنگ ڈتی۔ ایرانی سفیر آکھیے جو ڈوہاں ملکاں دے تعلقات ویلھے دے نال نال بئے مضبوط تھیندے پین،ساڈے مفادات، علاقائی اتے عالمی امور تے سوچ ہکا اے، ترئے سالاں اچ ڈوہاں ملکاں وچال تجارت داحجم 600 ملین ڈالرتوں ودھ تے 1.3ارب ڈالرتئیں پجنر گھاٹی سنگت دے ودھنڑ دا ثبوت اے، ایران دے در ہمیشہ پاکستانیاں اتے پاکستانی میڈیا کیتے کھلے ہین۔انہاں پاکستان اتے ایران دے میڈیا رابطیاں تے زور ڈتا تاں جو ہک بئے کوں سمجھنڑ اتے منفی پروپیگندے کوں مکاونڑ اچ مدد مل سگے۔انہاں اے پی پی اتے ایرانی خبررساں ایجنسی ارناوچال مفاہمت دی دستاویز کوں تیکھے حتمی شکل ڈیونڑ تے زور ڈیندے ہوئیں ایم ڈی اے پی پی کوں دورہ ایران دی وی دعوت ڈتی۔ایں موقع تے ایم ڈی اے پی پی مسعود ملک آکھیے جو ایران ہر اوکھے ویلھے پاکستان دے نال کھڑیے، علاقائی اتے بین الاقوامی حالات اچ نیوز ایجنسیاں دا کردار مسلمہ اے۔انہاں اے پی پی ولوں نیوز ایجنسیاں دی بین الاقوامی کانفرنس دا وی ذکر کیتا جیندے اچ خبررساں اداریان وچال خبراں اتے معلومات دے تبادلے سانگے طریقہ کار، مشترکہ ویب پورٹل دے قیام تے اتفاق کیتا گئے، اے پی پی گلوبل ویب پورٹل اچ ارنا وی شامل ہوسی۔
