ریلوے دا 40 ارب گھاٹا ختم کرنڑ دا چیلنج قبول کرینداں ، پشاورتوں لاہورتئیں ڈبل ٹریک بنڑاونڑ پہلی ترجیح اے ، وفاقی وزیر ریلوے شیخ رشید

راولپنڈی ۔ 24 اگست (اے پی پی) وفاقی وزیر ریلوے شیخ رشید ریلوے دا 40 ارب گھاٹا ختم کرنڑ دا چیلنج قبول کر گھدا ،انہاں آکھیے جو پشاور توں لاہورتئیں ڈبل ٹریک بنڑاونڑ پہلی ترجیح اے ،ریلوے کوں منافع بخش بنڑاونڑ سانگے 18گھنٹے کم کیرساں ،لوکاں کوں روزگار مل ویسی تے ریونیو ودھ ویسی ، سابقہ حکومت کرپٹ ہئی، ڈسایا گے جو ساریں توں چنگاں لیکن حقیقت کجھ بئی اے ۔ عید دے ڈوجھے ڈینھ راولپنڈی ریلوے سٹیشن دے دورے دے بعد میڈیا نال گال مہاڑ کریندے ہوئیں انہاں آکھیا جو اساکوں ریلوے اچ35توں 40ارب دے گھاٹے دا جہیز ملیے ، وزیر اعظم عمران خان ہدایت کیتی اے جو ریلوے دا گھاٹا ختم کرنڑاں ہے ، میں اے چیلنج قبول کرینداں، ریلوے کوں نعرہ ڈتے جو آرام حرام ہے، ریلوے کو ںٹھیک کرنڑ میڈی ذمے واری ہے تے میں قوم نال وعدہ کرینداں جو ریلوے کو ںمنافع بخش بنڑاونڑ سانگے 18 گھنٹے کم کریساں، لوکاں کوں روزگار وی مل ویسی تے ریوینو وی ودھا ڈیسوں ۔ انہاں آکھیا جو کہیں دے نال انتقامی کاروائی کائناں کیتی ویسی ،ساریں توں پہلے میڈااحتساب کیتا ونجے ادھا ریلوے نیب زدہ ہے، اساں ڈبل قیمت تے انجنڑ گھدن ، جیرھے جو لوک نیب کوں مطلوب ہن انہاں کوں سرنڈر کرنڑاں ہوسی ، کرپشن تے برداشت صفر ہوسی۔ انہاں آکھیا لوک سہولت آلا سفر چاہندن ، نویاں ریل گاڈیاں تے 10 فیصد رعایت ہوسی، ریلوے دے سارے ریسٹ ہاﺅس کو ںپرائیویٹ سیکٹر سانگے کھول ڈیسوں ، ریلوے دی پٹری وی کرائے تے ڈیونڑ سانگے تیار ہوں ، اگلے ہفتے ڈو نویاں ریل گاڈیاں دا اعلان کریسوں ، سواری دی گھٹکی کائنی فریٹ دی دے پاسے توجہ ڈیونڑیں ہوسی ۔انہاں آکھیا 31 ریلوے سٹیشن اپ گریڈ کریندے پیوں ، بہوں سارے پاکستانیاں بلٹ ٹرین سانگے اساکوں یقین ڈیوائے ،اساڈا پہلا ایجنڈا پشاورتوں لاہور ریلوے ٹریک ڈبل کرنڑاں ہے جتھاں سڑک کائنی اتھاں وی ریل گاڈی گھن تے ویسوں ، کراچی توں سکھر، راولپنڈی توں لاہور تے میانوالی تئیں ریل گاڈیاں چاہندوں۔