اسلام آباد ۔ 21 اگست (اے پی پی)وزیراعظم عمران خان بھارت کوںکشمیر سمیت سارے تصفیہ طلب امور تے گال مہاڑ دی دعوت ڈیندے ہوئیں آکھیے جو تجارت دا آغاز غربت دے خاتمے دا بہترین ذریعہ ہے ، منگل کوں اپنڑے ٹویٹ اچ وزیراعظم عمران خان بھارتی کرکٹرز نجوت سدھو دا حلف برداری تقریب اچ شرکت سانگے پاکستان آونڑ تے شکریہ ادا کیتے ۔ وزیراعظم آکھیا جونجوت سدھو امن دے پیامبر بن تے آئے جیں کوںپاکستانی عوام بے پناہ محبت اتے پیار ڈتا، وزیراعظم آکھیا جو بھارت اچ سدھو کوں نشانہ بنڑاونڑ آلیں برصغیر اچ امن کوں وڈا ضیا ن پجائے تے ایں گال زورڈتاجو امن دے بغیر اساڈے لوک ترقی نی کر سگدے ۔انہاں آکھیا جو مستقبل ولوں پیش قدمی سانگے بھارت اتے پاکستان کوں مذاکرات کرنڑیں ہوسن تے کشمیر سمیت سارے تصفیہ طلب معاملات دا حل کڈھنڑ ہوسی ۔غربت دے خاتمے تے برصغیر دے عوام دی زندگی اچ بہتری گھن آونڑ دا سوکھا نسخہ ہے جو گال بات دے ذریعے جھیڑے حل کیتے ونجن تے سانجھی تجارت دا آغاز کیتا ونجے