الیکشن کمیشن صدارتی انتخاب کیتے امیدواراں دی حتمی فہرست دااعلان کرڈتے،عارف علوی ، اعتزاز احسن اتے مولانا فضل الرحمان اچ مقابلہ تھیسی

اسلام آباد ۔ 30 اگست (اے پی پی) الیکشن کمیشن آف پاکستان صدارتی انتخاب کیتے امیدواراں دی چھیکڑی فہرست جاری کر ڈتی اے جیندے مطابق عارف علوی ، اعتزاز احسن اتے مولانا فضل الرحمان اچ مقابلہ تھیسی۔الیکشن کمیشن دے نوٹیفکیشن دے مطابق اسلامی جمہوریہ پاکستان دے آئین دے ڈوجھے شیڈول دے پیراگراف 5 دے تحت چیف الیکشن کمشنر/ ریٹرننگ آفیسر، صدر مملکت دے عہدے تے انتخاب کیتے امیدواراں دا اعلان کیتے جیندے اچ پاکستان پیپلزپارٹی دے اعتزاز احسن، پاکستان تحریک انصاف دے عارف الرحمن علوی اتے اپوزیشن ولوں فضل الرحمٰن انتخاب لڑسن۔الیکشن کمیشن خمیس آلا ڈینہہ کاغذات نامزدگی ولا گھنڑ کیتے مقرر کیتا ہا بھل کہین وی امیدوار کاغذات ولا نئیں چاتے۔ صدر دے منصب کیتے انتخاب 4ستمبر کوں تھیسی۔