ذوالحج 1439 ہجری دا چندر ڈیکھنڑ سانگے مرکزی رویت ہلال کمیٹی دا اجلاس آڈت وار کوں تھیسی

اسلام آباد ۔10 اگست(اے پی پی) ذوالحج 1439 ہجری دا چندر ڈیکھنڑ سانگے مرکزی رویت ہلال کمیٹی دا اجلاس آڈت وار کوں تھیسی ۔مرکزی رویت ہلال کمیٹی دے چیئرمین مفتی منیب الرحمان دی صدارت اچ اجلاس محکمہ موسمیات کراچی اچ تھیسی جڈاں جو زونل تے ضلعی کمیٹیاں دے اجلاس اپنڑیاں جہیں تے تھیسن ۔ پورے ملک توں ملنڑ آلیاں شہادتاں کوں سامنڑے رکھیندے ہوئیں چندر دے حوالے نال اعلان کیتا ویسی ۔ڈوجھے پاسے محکمہ موسمیات پیش گوئی کیتی اے جو 12اگست کوں ذوالحج دا چندر نظر آونڑ دا امکان اے جڈاں جو وڈی عید 22اگست کوں تھی سگدی اے ۔ محکمہ موسمیات دے مطابق چھنڑ چھنڑ دی ڈوپہر کوں چندر جمسی جیں دے بعد ودھ سارا امکان اے جو 12اگست کوں چندر سوکھیں نظر آ ویسی ۔ایں طرح ٹھیک ڈاہ ڈینھ بعد 22اگست کوں عید تھیونڑ دا ودھیک امکان اے ۔