سرکاری تے پرائیویٹ سکیماں دے تحت 82382 عازمین حجاز مقدس پج گن، ذرائع وزارت مذہبی امور

اسلام آباد ۔ 3 اگست (اے پی پی) فریضہ حج دی ادائیگی سانگے سرکاری اتے پرائیویٹ سکیماں دے تحت مجموعی طورتے 82ہزار 382 عازمین حجاز مقدس پج گن ، حج ٹوں پہلے فلائٹ اپریشن 15اگست تئیں پورا کر گھدا ویسی ۔وزارت مذہبی امور دے ذرائع اے پی پی کوں ڈسایا جو اجوکے سال مجموعی طور تے ہنڑ تئیں ہک لکھ 84ہزار 210 پاکستانی فریضہ حج ادا کریسن جیں اچ سرکاری سکیم دے تحت ہنڑ تئیں 55 ہزار 196 جڈاں جو پرائیویٹ سکیم دے تحت 27ہزار 186 عازمین حجاز مقدس پج گن۔ حج فلائٹ اپریشن اچ قومی ایئر لائن پی آئی اے، ایئر بلیو اتے سعودی ایئر لائن حصہ گھندی پئی اے۔ ذرائع ڈسائے جو اجوکے سال معاونین حج، خدام الحجاج اتے میڈیکل مشن دے تحت 2ہزار 859 افراد خدمات سر انجام ڈیسن جیں اچ مکة المکرمہ تے مدینہ منورہ اچ عازمین حج دی خدمت سانگے 711 لوکاں دی خدمات مقامی طور تے حاصل کیتیاں گن ۔ہنڑ تئیں مجموعی طورتے 1468 لوک مختلف شعبیں اچ عازمین حج دی خدمت سانگے حجاز مقدس اچ موجودہن ۔