اسلام آباد ۔ 27 اگست (اے پی پی) وزیراعظم عمران خان آکھیے جو قرض تے گذارا کرنڑ آلیاں قوماں دی کوئی عزت نئیں راہندی، قوم کوں اپنڑے پیریں تے کھڑا کریسوں، ملک اچ اینجھا نظام بنڑیسوں جو عوام ٹیکس ڈیون، ایندے کیتے آپ مثال بنڑسوں،ہر ڈو ہفتے اچ وقفہ سوالات اچ سوالاں دے جواب آپ ڈیساں، احتساب کیتے پارلیمان بہترین جاہ اے،گستاخانہ خاکیاں دے معاملے تے او آئی سی نال رل تے حکمت عملی بنڑیسوں، ہرویلھے ایہو جھیں واقعات مسلماناں دی ناکامی ہین۔ انہاں اے گال سینیٹ اچ پہلی واری خطاب کریندے ہوئے آکھی۔عمران خان آکھیے جو اساں گستاخانہ خاکیاں دا معاملہ اقوام متحدہ دی جنرل اسمبلی اچ ستمبر اچ چیسوں، مغرب اے گالھ نئیں سمجھدا جو اساں نبی کریم نال کتنا پیار کریندے ہیں،سلمان رشدی توں بعد جتنی واری وی اے معاملہ تھئے ،ولا ولا یہو کجھ تھیونڑاں مسلماناں دی ناکامی اے،ایندے تے او آئی سی کوں حکمت عملی بنڑاونڑی چاہیدی اے اتے مسلماناں کوں ایندے تے ہک مٹھ تھیونڑاہوسی۔انہاں آکھیے جو اساں اپنڑی سینیٹ کوں اگو تے گھن ونجنڑ چاہندے ہیں،ہر ڈو ہفتے اچ وقفہ سوالاں دے دوران سوالاں دے جواب میں ااپ ڈیساں، احتساب کیتے پارلیمنٹ بہترین جاہ اےاتے نویں رولز بنڑاونڑ کیتے سپیکر کوں آکھ ڈتے۔انہاں آکھیے جوپاکستان تے 28 ہزار ارب دا قرضہ چڑھ چکیے،قرض چکاونڑ کیتے سود ڈیندے ہیں ایندے کیتے بئے قرضے چاونڑے پوندن،جیکر اساں اپنڑی حالت بدلنڑ دی کوشش نہ کیتی تاں اللہ وی ساڈی حالت نہ بدلیسی، آپ ٹیکس ڈے تے عوام کوں وی ٹیکس ڈیونڑ دی راہ تے گھن آسوں، سادگی نال عوام کوں وی سنیہا ویسی،خرچے گھٹ کر تے آمدن ودھاونڑ اتے منی لانڈرنگ روکنڑکیتے کم کریندے پئے ہیں، سمندر پار پاکستانیاں کوں اعتماد ڈیویسوں جواو اپنڑا پیسہ پاکستان گھن آون، ایں سانگے ہک ہفتے اچ اپنڑا پلان پیش کر ڈیسوں،اساں اوکھ توں نکلسوں اتے قوم کون اپنڑے پیرین تے کھڑا کریسوں۔اقوام متحدہ اتے باہر دے دورے اوں ویلھے کریسوں جڈاں پہلے اپنڑا گھر ٹھیک کر گھنسوں۔
