اسلام آباد ۔ 20 اگست (اے پی پی) وفاقی وزیر اطلاعات و نشریات فواد چوہدری پاکستان بارے غلط تاثرات کو ں دور کرنڑ سانگے ذرائع ابلاغ دے موثر کردار دے ذریعے بین الاقوامی سطح تے مادر وطن دا مثبت تشخص اجاگر کرنڑ دے عزم دا اظہار کریندے ہوئیں آکھیے جو وزیراعظم عمران خان دے وژن اتے سادگی تے کفایت شعاری مہم کوں موثر انداز اچ عوام تئیں پجاونڑ اچ وزارت اطلاعات اتے ذرائع ابلاغ دااہم کردار ہے۔ سنوار کوں ایوان صدر اچ وفاقی کابینہ دے ارکان دی حلف برداری دے بعد ”اے پی پی“ نال گال مہاڑ کریندے ہوئیں انہاں آکھیا جو ذرائع ابلاغ دا ایشوز بارے اچ نہ صرف لوکاں کوں ڈساونڑ تے شعور بیدار کرنڑ بلکہ قومی اہمیت دے معاملات کوں اجاگر کرنڑ اچ اہم کردار ہے ۔ انہاں آکھیا جو نویں حکومت معاشرے توں بدعنوانی دے خاتمے، کفایت شعاری مہم، صحت تے تعلیم دے شعبیں دی بہتری ، ماحولیاتی مسلیں دے حل تے ادارہ جاتی اصلاحات سمیت مختلف شعبے دے حوالے نال وزیراعظم عمران خان دے وژن کوں اجاگر کرنڑ اچ ذرائع ابلاغ دی معاونت چاہیدی اے۔ انہاں بالخصوص سمندر پار پاکستانیاں دے کردار دا ذکر کریندے ہوئیں آکھیے جومیڈیا انہاں شعبیں کوں نمایاں کر سگدے جیں اچ ملک اگی تے ودھ تے انہاں شعبیں دی نشاندہی کرے جتھاں سمندر پار پاکستانی سرمایہ کاری کر تے قومی معیشت کو ں ودھارا ڈیونڑ اچ معاون تھی سگدن ۔ فواد چوہدری اپنڑی وزات دا ذکر کریندے ہوئیں آکھیے جو انہاں ترجیحات اچ عامل صحافیاں کوں تحفظ فراہم کرنڑاں تے اٹھویں ویج بورڈ دے عمل کوں اگی تے ودھاونڑاں ہے ۔ انہاں آکھیا جو قومی خبر رساں ادارے ایسوسی ایٹڈ پریس آف پاکستان (اے پی پی)، ریڈیو پاکستان اتے پاکستان ٹیلی ویژن سمیت سرکاری ذرائع ابلاغ دے پیشہ ورانہ امور کار کوں بہتر بنڑایا ویسی تے غیر ملکی ذرائع ابلاغ دی طرز تے کہیں سیاسی مداخلت دے بغیر انہاں کوں خود مختار بنڑایا ویسی ۔ وزیر اطلاعات آکھیا جو انہاں اداریں دے بورڈز کوں ودھ مضبوط بنڑاونڑ دے نال نال انہاں دے سروس سٹرکچر دی تشکیل نو کیتی ویسی ۔
