اسلام آباد ۔ 24 اگست (اے پی پی)وزیر خارجہ شاہ محمود قریشی واضح کیتے جو پاکستان دی جگ اچ موثر ترجمانی کیتی ویسی،اپنڑا موقف یکسوئی نال دنیا دے اگو رکھسوں،وخارجہ پالیسی اچ خطے کیتے امن ساڈی ترجیح ہوسی،ہمسایہ ملکاں نال چنگے چنگے تعلقات دی کوشش کریسوں،امریکی وزیر خارجہ توں بعد چینی وزیر خارجہ وی پاکستان آندے پین،مارک پومپیودا دورہ اہم ہوسی،پاکستان کوں مالی اوکھ توں کڈھنڑ کیتی سمندر پار پاکستانیاں دی مدد دی لوڑھ اے۔اے گالھ وزیر خارجہ شاہ محمود قریشی وفاقی کابینہ اجلاس اتے وزیراعظم کوں وزارت خارجہ اچ بریفنگ توں بعدمیڈیا نال گالھ مہاڑکریندے ہوئے آکھی۔انہاں آکھیا جووزیراعظم کون وزارت خارجہ دے امور اتے سی پیک بارے بریفنگ ڈتی گئی، ساکوں ملک دی معاشی ترقی پیاری اے، ایں سانگے ساڈی ضرورت اے جو خطے اچ امن ہووے، ہمسایہ ملکاں افغانستان، بھارت، ایران دے نال نال امریکا نال چنگے تعلقات کیتے پوری کوشش کریسوں،افغانستان اچ امن کیتے افغان صدر اشرف غنی وی مثبت اشارہ ڈتے۔شاہ محمود قریشی آکھیے جو پاکستان اتے بھارت دے تعلقات گو چنگے نئیں بھل عمران خان دے بھارت کوں مثبت پیغام توں بعد بھارتی وزیرِ خارجہ وی جواب اچ مبارکی دا خط بھیجے۔ انہاں آکھیے جو وزیراعظم دی امریکی وزیر خارجہ نال ٹیلی فون تے گالھ مہار اچ دہشتگرداں دی پاکستان اچ موجودگی بارے کوئی گالھ نئیں تھئی،امریکی حکام کوں پاکستان دے تقاضے سمجھنڑے ہوسن،مارک پومپیوپنج ستمبر کوں پاکستان پجدے پین،وزیراعظم نال انہاںدی ملاقات اہم ہوسی۔انہاں آکھیے جو چینی وزیر خارجہ وی 8 یا 9 ستمبر کوں پاکستان آسن میں انہاں دا بہوں تانگھی ہاں، ساڈے کیتے یورپی یونین دی وی اہمیت اے،اساں نئیں چاہندے جو ساکوں بلیک لسٹ اچ پاتا ونجے،ملک کوں معاشی مشکلات اچوں کڈھنڑ کیتے سمندر پار پاکستانیاں دی مدد دی لوڑھ ہوسی۔ایران نال تعلقات دے حوالے نال شاہ محمود قریشی واضح کیتے ایران امریکا کشیدگی اچ اگو تے ودھنڑ کیتے ساکوں حکمت عملی سوچ سمجھ تے بنڑاونڑی ہوسی۔
