اسلام آباد ۔ 9 اگست (اے پی پی) وزارت مذہبی امور سعودی حج مجالمہ ویزے دے ناں تے کجھ عناصر ولوں سادہ لوکاں توں باری رقم بٹورنڑ دی اطلاعات دا نوٹس گھندے ہویں عوام کوں چتاونڑیں ڈتی اے جو ایں سلسلے اچ کہیں وی غیر متعلقہ بندے نال رقم دے لین دین توں اجتناب کیتا ونجے نتاں درخواست گزار لین دین دا خود ذمے وار ہوسی ۔ ذرائع دے مطابق وزارت مذہبی امور کوں شکایت ملی ہے جو حج مجالمہ ویزے دا چکما ڈے تے کجھ عناصر سادے لوکاں توں بھاری رقماں گھندے پن ۔ وزارت مذہبی امور آکھیے جو مجالمہ ویزے دا کلی اختیار اتے صوابدید اسلام آباد اچ تعینات سعودی سفیر دی ہے ۔ وزارت مذہبی امور دا حج مجالمہ ویزے نال کوئی تعلق کائنی ۔ ایں سانگے عوام ایجھے عناصر توں ہوشیار رہے تے کہیں وی قسم دے غیر متعلقہ بندے نال کہیں قسم دا لین دین نہ کرن نتاں درخواست گزار رقم دے لین دین دا ذمے وار خود ہوسی ۔
