عالمی امور تے پاکستان اتے چین ہک بئے دی مکمل حمایت جاری رکھیسن، سی پیک منصوبہ چینی صدر دے ‘ون بیلٹ، ون روڈ’ وژن دی عکاسی ہے ، چینی وزیر خارجہ ولوں نومبر اچ وزیراعظم عمران خان کوں چین دے دورے دی دعوت ، پاکستان اپنڑیں سرزمین کہیں دے خلاف دہشت گردی سانگے استعمال کائناں تھیونڑ ڈیسی ، پاکستان اتے چین دے وزرائے خارجہ دی ملاقات دے بعدسانجھی پریس کانفرنس

اسلام آباد ۔08 ستمبر(اے پی پی)پاکستان اتے چین ایں عزم دا اعادہ کیتے جو عالمی امور تے پاکستان اتے چین ہک بئے دی مکمل حمایت جاری رکھیسن،’سی پیک منصوبہ چینی صدر دے ‘ون بیلٹ، ون روڈ’ وژن دی عکاسی ہے جڈاں جو وزیر خارجہ شاہ محمود قریشی آکھیے جو پاکستان پرعزم ہے جوا وہ اپنڑیں سرزمین کہیں دے خلاف دہشت گردی سانگے استعمال کائناں تھیونڑ ڈیسی ۔ ہفتہ کوں پاکستان دے دورے تے آئے ہوئے چین دے وزیر خارجہ وانگ ژی دفتر خارجہ دا دورہ کیتا ۔ ایں موقع تے وزیر خارجہ شاہ محمود قریشی انہاں دا استقبال کیتا۔ ڈوہائیں ہم منصباں وچال ملاقات وی تھئی جیندے اچ ڈوطرفہ تعلقات تے خیالیں دا تبادلہ کیتا گیا ۔ سانجھی پریس کانفرنس دوران وزیر خارجہ شاہ محمود قریشی آکھیے جو وانگ ژی پاکستان دے پرانڑے یار ہن اتے انہاں ہمیشہ پاکستان دی حمایت کیتی۔ انہاں ڈسایا جو چین دے وزیر خارجہ دورہ پاکستان دوران صدر، وزیراعظم اتے آرمی چیف نال ملاقاتاں کریسن۔ انہاں آکھیا جو پاک چین یاری کوں عوامی اتے حکومتی سطح تے چنگی پذیرائی حاصل ہے، سی پیک چینی صدر دے ون بیلٹ ون روڈ وژن دی عکاسی ہے۔ شاہ محمود قریشی آکھیے جو چینی قیادت ولوں وزیراعظم سانگے تہنیتی پیغامات تے مشکور ہن۔ چینی وزیر خارجہ نومبر اچ وزیراعظم عمران خان کوں دورہ چین دی دعوت ڈتی ہے جڈاں جو پاکستان وی چین دے صدر اتے وزیراعظم کو ںدورہ پاکستان دی دعوت ڈتی ہے۔ شاہ محمود قریشی آکھیے جو چینی ہم منصب نال ملاقات دوران ڈوطرفہ تعلقات اتے عالمی امو رتے گالھ بات تھئی۔ انہاں آکھیا جو سی پیک پاکستان اتے خطے سانگے ودھ ساری اہمیت رکھیندے ، سی پیک تے کم کرنڑ آلے چینی شہریاں دا تحفظ اتےسلامتی پہلی ترجیح ہے۔ ملاقات دوران غربت مکاونڑ اتے روزگار دے مواقع پیدا کرنڑ تے گالھ بات تھئی۔ وزیر خارجہ ایں موقع تے واضح کیتا جو پاکستان اپنڑیں سرزمین دہشت گردی سانگے استعمال کائناں تھیونڑ ڈیسی، پاکستان دہشت گردی دے خلاف جنگ اچ اہم کردار ادا کیتے، چین دہشت گردی دے خلاف پاکستان دیاں قربانیاں دی تعریف کیتی ہے، چین عالمی برادری تے زورڈتے جو ا وہ پاکستان دیاں قربانیاں کوں منے۔ وزیر خارجہ ڈسایا جو ملاقات دوران چین نال تجارتی تعاون ودھاونڑاتے برآمدات دے فروغ تے گالھ بات تھئی۔انہاں آکھیا جواساںبین الاقوامی فورمز تے بھرپور حمایت تے چین دے شکر گزار ہسے، پاکستان چین نال عالمی فورمز تے وی رل مل تے کم کریندا راہسی۔ ایں موقع تے چینی وزیر خارجہ وانگ ژی آکھیا جو پاکستان چین داجگری اتے قابل اعتماد دوست ہے، پاکستان کو ںدرپیش مسئلے رل مل تے حل کر یسوں، پاکستان دے نال ہر شعبے اچ بھرپور تعاون جاری رکھیسوں، انہاں آکھیا جوپاکستان دے دورے دا مقصد نویں حکومت دے نال رابطے ودھاونڑ ہے۔ انہاں آکھیا جو چین اپنڑیں خارجہ پالیسی اچ پاکستان کوں بہوں اہمیت ڈیندے، پاکستانی ہم منصب نال ملاقات مثبت رہی، پاکستان نال تزویراتی تعلقات بئے پکے کرنڑ چاہندوں ۔ انہاں آکھیا جو غربت مکاونڑ اتے پاکستان دی ترقی سانگے بھرپور تعاون کریسوں، پاکستان نال جاری سارے منصوبے مکمل کریسوں، ڈوہائیں ملکاں وچال تعاون نال سرمایہ کاری اچ ودھارا اتے بیروزگاری اچ گھٹکی تھیسی، چینی تعاون دا مقصد پاکستان اچ تعلیم، زراعت اتے بئے شعبیاں کوں چنگا بناونڑ ہے۔ انہاں آکھیا جو دنیاوچوں دہشت گردی کوں منڈھوں مکاونڑ اساڈی ترجیحات اچ شامل ہے، معاشی ترقی اتے غربت مکاونڑ سانگے سانجھے سیمینار منعقد کریسوں، ایندے نال عوامی رابطیاں اتے ڈوہائیں ملکاں وچال مختلف شعبین اچ تعاون اچ ودھارا تھیسی ۔ انہاں آکھیا جو افغانستان اچ امن و استحکام سانگے ڈوہائیں ملک رل مل تے کم کریسن۔ ہک سوال دے جواب اچ شاہ محمود قریشی آکھیا جو پاکستان چین دے نال رل مل تے اگی تے ودھنڑ دے عزم دا اعادہ کریندے، پاک چین تعلقات دی خوبصورتی ایہ ہے جو ایندے اچ کہیں وی سطح تے کوئی تحفظات کائنی ہن۔ انہاں ڈسایا جو چینی وزیر خارجہ دے نال علاقائی امن، دہشت گردی خلاف سانجھا لائحہ عمل بنڑاونڑ ،برآمدات سانگے سبسڈیز تے وی گالھ بات تھئی۔ چینی وزیر خارجہ پاکستان نال دفاعی تعاون ودھاونڑ دااعلان کریندے ہوئیں آکھیا جو پاکستان دہشت گردی دے خلاف ڈھگ قربانیاں ڈتیاں ہن ، چین دہشت گردی دے خلاف پاکستان دیاں کوششاں دی مکمل حمایت کریندے جڈاں جو عالمی معاملات تے وی پاکستان دی مکمل حمایت کریندے راہسوں۔