وزیراعظم ہاﺅس کوں اعلیٰ درجے دی یونیورسٹی اتے چارے گورنر ہاﺅسز کوں میوزیم بنڑائے ونجنڑ دا فیصلہ کیتے ، شفقت محمود

اسلام آباد ۔ 13 ستمبر (اے پی پی) وفاقی وزیر تعلیم و پیشہ ورانہ تربیت شفقت محمود آکھیا جو وزیراعظم ہاﺅس کوں اعلیٰ درجے دی یونیورسٹی اتے چارے گورنر ہاﺅسز کوں میوزیم بنڑاونڑ دا فیصلہ کرگھدا گئے ، جڈانجو بئے سرکاری عمارتاں کوں سیاحتی مقامات اتے ہوٹلاںاچ تبدیل کیتا ویسی ، انہاں عمارتاں اُتے آونڑ آلے سالانہ 105 کروڑ روپے دے اخراجات دی تھیسی ۔ خمیس کوں وزیراعظم دی صدارت اچ تاریخی عمارات دے ولا استعمال مجوزہ منصوبے بارے اجلاس دے بعد میڈیا دے نمائندیاں کوں تفصیل نال ڈسیندے ہوئیں انہاں ڈسایا جو وزیراعظم عمران خان قوم نال آپنڑیں خطاب اچ سادگی اختیار کرنڑ دا آکھیا ہئی ۔ انہاں اجلاس دی صدارت کریندے ہوئیں آکھیا جو حکومتاں دے شاہانہ طرز طریقے نال لوک پریشان ہن ، ایں سانگے حکومت شاہانہ اخراجات کوں ختم کرتے سادگی اختیار کرنڑ دا فیصلہ کیتے ۔ انہاں آکھیا جو اجلاس اچ فیصلہ کیتا گئے جو 1096 کنال اُتے محیط وزیراعظم ہاﺅس اسلام آباد کوں ہک اعلیٰ درجے دی یونیورسٹی اچ تبدیل کیتا ویسی ، وزیراعظم ہاﺅس اُتے سالانہ 47 کروڑ روپے دے اخراجات آندے ہن ، جیندی بچت تھیسی ۔ انہاں آکھیا جو اجلاس اچ فیصلہ کیتا گئے جو وزیراعظم ہاﺅس دے پچھلے پاسوں موجود زمین اُتے یونیورسٹی کیتے نویں عمارت تعمیر کیتی ویسی ، یونیورسٹی کیتے پی سی ون بنڑایا ویسی ، یونیورسٹی دے قیام سانگے وزیر تعلیم شفقت محمود، چیئرمین ایچ ای سی ڈاکٹر طارق بنوری اتے ڈاکٹر عطاءالرحمن اُتے مشتمل کمیٹی بنڑائی گئی ہے ، اے یونیورسٹی تعلیمی لحاظ نال منفرد ہوسی ۔ انہاں آکھیا جو گورنمنٹ ہاﺅس مری جیندی تزئین و آرائش اُتے حال ہی اچ پنجاب حکومت 60 کروڑ روپے خرچ کیتے ، کو ںہیریٹج بوتیک ہوٹل بنڑایا ویسی ، ایں عمارت اُتے سالانہ چار کروڑ روپے دے اخراجات آندے ہن ۔ انہاں آکھیا جو پنجاب ہاﺅس مری کوں سیاحتی کمپلیکس ا چ تبدیل کیتا ویسی ، پنجاب ہاﺅس مری اُتے سالانہ ڈھئی کروڑ روپے خرچ تھیندے ہن ۔ تعلیم بارے وزیر ڈسایا جو راولپنڈی اچ پنجاب ہاﺅس اتے ایندے نال جڑیے گورنر انیکسی جیہڑی جو مجموعی طور تے 70 کنال زمین اُتے ہے ، اُتے سالانہ چار کروڑ روپے خرچ تھیندے ہن ، کوں اعلیٰ تعلیمی ادارے اچ تبدیل کیتا ویسی ، ایں بارے فیصلہ پنجاب حکومت کریسی ۔ انہاںآکھیا جو گورنر ہاﺅس لاہور جیہڑا جو 700 کنال زمین اُتے مشتمل ہے، اچ قائم ووکیشنل ٹریننگ انسٹی ٹیوٹ اتے سکول کوں انج کر تے عمارت اچ میوزیم اتے آرٹ گیلری بنڑائی ویسی ۔ انہاں آکھیا جو گورنر ہاﺅس کراچی اچ میوزیم بنڑایا ویسی ، اے تجویز سندھ حکومت دے نال رل تے اگوں ودھائی ویسی ، جڈانجو سٹیٹ گیسٹ ہاﺅس کراچی کو ںگورنر ہاﺅس دے طور تے استعمال کیتا ویسی ۔ انہاں آکھیا جو اجلاس اچ قصر ناز کراچی دی عمارت کو ںفائیو سٹار ہوٹل اچ تبدیل کرنڑ دا فیصلہ کیتا گئے ۔ انہاں آکھیا جو گورنر ہاﺅس بلوچستان کوں میوزیم اتے بلوچ ہیریٹج اچ تبدیل کیتا ویسی جڈانجو ایندے پارکس کوں صرف تریمتیں کیتے مخصوص پارک بنڑاونڑ دا فیصلہ کیتا گئے ۔ انہاں آکھیا جو گورنر ہاﺅس پشاور جیہڑا جو ہک تاریخی عمارت ہے، کوں میوزیم اتے قبائلی ثقافت دا عکاس بنڑایا ویسی ، نتھیا گلی گورنر ہاﺅس کوں ہک اعلیٰ درجے دے ہوٹل اتے سیاحتی مقام اچ تبدیل کیتا ویسی ۔