وفاقی وزیر قومی صحت عامر محمود کیانی دی صدارت اچ دوائیں دے برآمد کنندگان دا اجلاس

اسلام آباد ۔ 27 ستمبر (اے پی پی) وفاقی وزیر قومی صحت، سروسز عامر محمود کیانی دی صدرات اچ دوائیں دے برآمد کنندگان دا اجلاس منعقدتھیا۔ اجلاس اچ دوائیں دے حجم تے متبادل دوائیں دی بر آمدات اچ ودھارے دے میکنزم بارے گال مہاڑ کیتی گی ۔ ڈرگ ریگولیٹری اتھارٹی آف پاکستان(ڈریپ) دے چیف ایگزیکٹو افیسر (سی ای او) ڈاکٹر شیخ اختر حسین وفاقی وزیر کوں ڈسایا جو ڈریپ انہاں مقامی دوائیاں ساز اداریں کوں سہولتاں دی فراہمی دے اقدامات کیتن جیرھے جو ڈوجھیں ملکاں کوں دوائیں بر آمد کریندے پن ۔ انہاں اقدامات تے سہولتاں اچ تکھے رجسٹریشن ہک سال اچ ہک لکھ ڈالرز دی برآمدات کرنڑ آلیں دی رجسٹریشن اچ رعایت تے برآمدات دی غرض نال ریگولیٹری دستاویزات دا اجراءشامل ہن۔ وفاقی وزیر اجلاس دے دوران دوائیں ساز صنعت ولوں تحفظات دے جواب اچ ایں گا ل تے زور ڈٹا جو انہاں دے مسلیں سانگے ٹڈاپ تے کسٹمز نال گال کیتی ونجے تے دوائیں دے بر آمد کنند گان دے نال ہکو جے سلوک دی ضرورت اے ۔انہاں آکھیا پاکستان دے دوائیں بنڑاونڑ آلے اداریں اچ وڈی صلاحیت پاتی ویندی اے ملک کوں ایندے ثمرات توں فائدہ چاونڑ دی ضرورت اے ،جیں سانگے دوائیں تے متبادل دوائیاں دی بر آمدات اچ بہتری گھن آتے زر مبادلہ کمایا ونج سگدے ۔وفاقی وزیر آکھیا جو باہرلے ملکاں اچ پاکستانی مشن دے نال کم کریندے ہوئیں مطلوبہ اہداف حاصل کیتے ونج سگدن ،انہاں فارما سیکٹر کوں ہدایت کیتی جو او بر آمدات دا حجم ودھاونڑ دے طریقیں بارے ورکنگ پیپر ڈیون ۔اجلاس دے دوران ڈریپ دے چیف ایگزیکٹو آفیسر دوائیں دے بر آمد کنندگان کوں مزید سہولتاں دی فراہمی دا یقین ڈوایا ۔