اسلام آباد ۔ 12ستمبر (اے پی پی) وزیراعظم عمران خان نویں ہجری سال دے ایثار تے قربانی تے مبنی حقیقی پیغام تے عمل پیرا تھیونڑ دی ضرورت تے زور ڈیندے ہوئیں آکھیے جو اساکوں محدود علاقائی، ذاتی اتے نسلی نفرتاں تے بلاوجہ دے تعصبات کو ںخیر باد آکھ تے ملک تے قوم دی ترقی اتے خوشحالی سانگے کم کرنڑاں چاہیدے ،ایہو سدھا دگ اے ۔انہاں اے گال ہجری سال 1440ھ/2018ءدے موقع تے قوم دے ناں پیغام اچ آکھی ۔ وزیراعظم اسلامی سال دے آغاز دے بابرکت موقع تے پاکستانی قوم اتے اہلِ اسلام سانگے نیک خواہشات دا اظہار کریندے ہوئیں بارگاہ الٰہی اچ دعا کیتی جواے سال اُمت مسلمہ سانگے باعث رحمت ثابت تھیوے۔ انہاں آکھیا جو محرم الحرام دے مہینے کوں اسلام دی آمد توں پہلے ویی بہوں عزت تے توقیر حاصل ہئی جڈاں جو اسلام ایندی عظمت اچ مزید ودھارا کیتا – وزیراعظم آکھیا جوہجری سال دی ابتدا سرکار دو عالم حضرت محمدﷺ اتے انہاں دے جاں نثار اصحاب دی مکہ توں مدینہ ہجرت نال تھیندی اے جڈاں انہاں مخالفین اسلام دے ظلم وستم توں تنگ آتے اللہ تعالیٰ دے حکم نال ہجرت دی اے عظیم مثال پیش کیتی جیں اچ انصار اتے مہاجرین وچال مواخات دا بے مثال رشتہ قائم تھیا۔ عمران خان آکھیا جو ایں مبارک مہینے اچ رونما تھیونڑ آلے ایں عظیم واقعے توں رہنمائی گھندے ہوئیں اساکوں جذبہ ایثار تے قربانی ، اخوت تے بھرپی ، ہمدردی تے مذہبی رواداری اتے صبروبرداشت دے پرچار اتے ان اعلیٰ اقدار تے عمل دی ضرورت پہلے توں کتھائیں ودھ ہے ۔ وزیراعظم اللہ تعالیٰ توں دعا کیتی جو او اساکوں اپنڑی پناہ اچ رکھے پاکستان کوں امن ، ترقی تے خوشحالی نال ہمکنار فرماوے تے نویں ہجری سال دے اصل پیغام جیرھا جو ایثار تے قربانی تے مبنی ہے اساڈی زندگی اچ شامل فرماوے ۔
