تحریک انصاف اتے اتحادی جماعتاں دے صدارتی امیدوار ڈاکٹر عارف علوی واضح اکثریت نال ملک دے13 ویں صدر مملکت منتخب

اسلام آباد ۔ 4 ستمبر (اے پی پی) تحریک انصاف اتے اتحادی جماعتاں دے صدارتی امیدوار ڈاکٹر عارف علوی واضح اکثریت نال 3 ویں صدر مملکت منتخب تھی گئے ۔ انہاں دے مدمقابل مسلم لیگ (ن)، متحدہ مجلس عمل سمیت بیاں اتحادی جماعتاں دے امیدوار مولانا فضل الرحمان ڈوجھے جڈانجو پیپلز پارٹی دے امیدوار اعتزاز احسن تریجھے نمبر اُتے ریہے ۔ صدارتی انتخاب کیتے منگل کوں چارے صوبائی اسمبلیاں اتے قومی اسمبلی اچ پولنگ تھئی ۔ انہاں ایواناں کوں باقاعدہ تحاریک دے ذریعے پولنگ ایجنٹ دے طور تے استعمال دی منظوری گھدی گئی ۔ پولنگ دا آغاز سویلے 10 وجے تھیا جیہڑا جو بغیر کہیں وقفے دے سہ پہر چار وجے تئیں جاری ریہا ۔ قومی اسمبلی ہال اچ قومی اسمبلی اتے سینیٹ دے اراکین آپنڑیں ووٹ دا حق استعمال کیتا جڈانجو چارے صوبائی اسمبلیاں اچ صوبائی اسمبلیاں دے رکناں صدارتی انتخاب کیتے ووٹ پاتا۔ قومی اسمبلی، سینیٹ اتے بلوچستان اسمبلی اچ ہک رکن ہک ووٹ جڈانجو پنجاب، سندھ اتے خیبر پختونخوا اسمبلیاں دے ووٹاں کوںساریاں توں گھٹ ووٹ دی حامل اسمبلی بلوچستان دے 65 ووٹاں دے حساب نال تقسیم کیتا گیا ہئی ۔ صدارتی انتخاب کیتے الیکٹورل کالج دے ووٹاں دی تعداد 706 ہئی جڈانجو قومی اسمبلی دی 12، سینیٹ دی 2 اتے بلوچستان اسمبلی دیاں 4 نشستاں خالی ہن ۔ قومی اسمبلی اتے سینٹ اچ پاتے گئے کل ووٹاں دی تعداد 430ہئی جڈانجو 6ووٹ مسترد قرار ڈتے گئے ۔ غیر حتمی نتائج دے مطابق تحریک انصاف دے صدارتی امیدوار ڈاکٹر عارف علوی کو ںقومی اسمبلی اتے سینیٹ توں 212 ووٹ ملے بلوچستان اسمبلی اچوں45، پنجاب اسمبلی اچوں 186، سندھ اسمبلی اچوں 56 اتے خیبر پختونخوا اسمبلی اچوں 78 ووٹ ملے۔ مسلم لیگ (ن) اتے اتحادی جماعتاں دے امیدوار مولانا فضل الرحمان کوں قومی اسمبلی اتے سینیٹ اچوں 131، بلوچستان اسمبلی اچوں 15، پنجاب اسمبلی اچوں 141، سندھ اسمبلی اچوں ہک اتے خیبر پختونخوا اسمبلی اچوں 26 ووٹ ملے۔ پاکستان پیپلز پارٹی دے صدارتی امیدوار اعتزاز احسن کوں قومی اسمبلی اتے سینیٹ اچوں 81، بلوچستان اسمبلی اچوں کئی ووٹ کائنی ملیا ، انہاں کوں پنجاب اسمبلی اچوں 6، سندھ اسمبلی اچوں 100 ووٹ اتے خیبر پختونخوا اسمبلی اچوں 5 ووٹ ملے۔ وزیراعظم عمران خان، چارے وزراءاعلیٰ، چیئرمین سینیٹ، سپیکر قومی تے صوبائی اسمبلیاں سمیت سارے اہم حکومتی شخصیات اتے اپوزیشن آپ دے ووٹ دا حق استعمال کیتا۔ ریٹرننگ افسر ولوں صدارتی انتخاب دا کٹھا نتیجہ اج بدھ کوں جاری کیتا ویسی ۔