حکومت ضمنی مالیاتی (ترمیم) بل 2018ءقومی اسمبلی اچ پیش کر ڈتا وفاقی وزیر خزانہ اسد عمر قومی اسمبلی اچ ضمنی مالیاتی (ترمیم) بل 2018ءپیش کیتا

اسلام آباد ۔ 18ستمبر (اے پی پی) قومی اسمبلی اچ حکومت ضمنی مالیاتی (ترمیم) بل 2018ءپیش کرڈتا جیں دے تحت وزیراعظم‘ چارے گورنرز‘ وزیر اعلیٰ تے وفاقی وزیراں دیاں تنخواہیں اتے مراعات اچ حاصل ٹیکس استثنیٰ ختم کرڈتا ویسی ‘ مالی بل 2018ءاچ انکم ٹیکس اچ ڈتی ونجنڑ آلی چھوٹ اچ رد بدل کر ڈتا گے ،پنشن اچ 10فیصد ودھارا کیتا ویسی ،1800سی سی توں ودھ پر تعیش گاڈیاں تے ڈیوٹی 10فیصد توں ودھا تے 20فیصد کر ڈتی گی اے ،پٹرولیم لیوی دی مد اچ 100ارب دی اضافی یوی واپس گھننڑ دی تجویز ڈتی گی جیں نال پٹرولیم مصنوعات دیاں قیمتاں اچ گھٹکی تھیسی ،ڈیماں دی تعمیر ،سی پیک منصوبے ،ہائر ایجوکیشن دے ترقیاتی پروگرام بدستور جاری رہسن ،ترقیاتی بجٹ تے 725ارب روپے خرچ کیتے ویسن ،سگریٹ تے ٹیکس اچ ودھارے دی تجویز شامل ہے ،ریو نیو اچ 183ارب روپے دے ودھارے سانگے اقدامات تجویز کیتے گن جیں اچ 92ارب روپے کوئی نواں ٹیکس لاوے ،بغیر جدید ٹیکنالوجی تے بہتر انتظامی اقدامات دے ذریعے پورا کیتا ویسی ۔اگر اے اصلاحات نہ لاتیاں گیاں تاں خسارہ 2790ارب روپے تئیں پج ویسی جیں دا پاکستان متحمل کائنی تھی سگدا ،وزیراعظم عمران خان دی زیر قیادت ایجھا پاکستان بنڑیندے پیوں جیں تے ساری دنیا فخر کریسی ۔منگل کوں قومی اسمبلی اچ وزیر خزانہ اسد عمر فنانس بل 2018-19ءاچ ٹیکساں تے ڈیوٹیاں دی شرح اچ رد بدل سانگے ضمنی مالیاتی ( ترمیمی ) بل 2018پیش کیتا ۔ایں موقع تے انہاں ضمنی بل پیش کرنڑ دی اساکوں ایں سانگے ضرورت پیش آئی کیوں جو اساں بجٹ دے موقع تے اے اعتراض چاتا ہئی جو پورے سال دا بجٹ پیش نہ کیتا ونجے ۔ڈو وجہ دی بنا تے اساکوں ضمنی فنانس بل پیش کرنڑاں پیا ۔ملک دے معاشی ماہرین وی تجزیہ کیتے جو بجٹ دے موقع تے منظور کرایا ونجنڑ آلے فنانس بل اصل حقائق نال مطابقت کائنی رکھیندا ۔اگر اساں اے معاشی تبدیلی کائناں گھن آسوں تاں ملک دی معیشت سانگے چنگاں کائناں ہوسی ۔صورت حال چنگی کائنی اساں قوم دے سامنڑے سچ بولنڑ چاہندوں ۔اساں ایجھی صورت حال پیدا کرنڑ چاہندوں جو روزگار دے موقع پیدا تھیون ،بر آمدات بہتر تھیون ،قرضیں تے انحصار نہ کرنڑاں پووے ،اسد عمر گزریل بجٹ خسارہ 6.6فیصد تئیں پج گے ۔موجود ہ بجٹ خسارہ گردشی قرضے دی وجہ توں 8.6فیصد تئیں پج گے ۔ مسلم لیگ (ن) دی حکومت اقتصادی صورت حال دے حوالے نال جیرھے اقدامات کیتن او تاریخ دا حصہ ہن ۔گزریل ہک سال اچ صرف بجلی دے شعبے اچ خسارہ 450 ارب اتے گیس اچ 100ارب روپے تئیں پج گے ،اجوکے سال اے گھاٹا 2900ارب تئیں پجنڑ د ڈر ہے ۔انہاں آکھیا 2012-13اچ کرنٹ اکاﺅنٹ خسارہ ڈھائی ارب ڈالر ہئی ۔گزریل سال اے گھاٹا 18ارب ڈالر تئیں پج گے ۔مسلم لیگ ن دے دور حکومت اچ قرضیں اچ 34ارب ڈالر ودھارا تھیا ۔جیں دی وجہ توں زر مبادلہ دے حوالے نال خطرے دی گھٹنی وجنڑ شروع تھی گی ۔در آمدات ودھ گھن ایندے مقابلے اچ بر آمدات گھٹ ہن ،جیں دی وجہ توں ڈالر دے مقابلے اچ روپے دی قدر اچ 20روپے دی گھٹکی تھی ۔اگر صورت حال ایہا رہی تاں روپے دی قدر مزید متاثر تھیسی ۔ پٹرول ‘ خوردنی تیل اتے گیس دیاں قیمتاں اچ ودھارا تھیسی ۔سرکاری قرضے وی 2800ارب تئیں پج گن ۔سٹیل مل تے پی آئی اے دے قرضے انجھ ہن ۔انہاں آکھیا ورکر ویلفیئر بورڈ دے فںڈ دے وی 40ارب روپے وفاق روک رکھین ۔انہاں فنڈز نال مزدوراں دے گھراں دی تعمیر انہاں دے بالاں دیاں فیساں رک گن ۔ اتنے برے حالات تھی گن لوک خود کشی کریندے پن ۔ایوان ایںصورت حال توں نکلنڑ دا فیصلہ کیتے جو اگی تے کیویں ودھنڑاں ہے ۔وزیر خزانہ آکھیا جو وفاق دے محصولات اچ 350ارب روپے گھٹ تھیونڑ دی توقع ہے ۔ایں طرح خرچے 250ارب ڈکھائے گن جیرھے جو ایندے توں ودھ ہوسن ۔انہاں آکھیا اوکھے وقت اچ فیصلے کرنڑیں پوندن ۔غریب پہلے توں مشکل اچ ہے اساں صاحب ثروت تے بوجھ پاونڑاں ہے ،غریب کوں ایندے توں بچاونڑاں ہے۔ملک دی معیشت زرعی تے صنعتی ترقی تے بر آمدات اچ ودھارے دی وجہ توں بہتر تھیسی ۔ہک لکھ ٹن کھاد دی مقامی پیداوار ودھیسوں تے کساناں کوں سبسڈی ڈیسوں ۔وزیراعظم فیصلہ کیتے جو وفاقی دارالحکومت اتے فاٹا اچ 5لکھ 40ہزار روپے تئیں صحت کارڈ شروع کیتا ویسی ۔انہاں آکھیا مزدوراں سانگے ساڈھے چار ہزار گھربنڑاونڑ دا فیصلہ کیتا گے ۔ایندے علاوہ مزید ڈاہ ہزار گھر بنڑائے ویسن ۔ پٹرولیم ڈویلپمنٹ لیوی اچ ودھارا متوسط طبقے دے نال ظلم ہے ۔2018-19دے بجٹ اچ 100ارب روپے دا پٹرولیم ٹیکس لاتا گے ٹیکس ختم کرنڑ دا فیصلہ کیتا گے ۔ایکسپورٹ انڈسٹری کوں 82آئٹم تے ریگولیٹری ڈیوٹی ختم کرتے ریلیف ڈیندے پیوں ۔اساں محصولات اچ 183ارب روپے دے ودھارے نال اقدمات کریندے پیوں ۔92ارب روپے دا کوئی نوں ٹیکس لاتے بغیر جدید ٹیکنالوجی تے بہتر انتظامی اقدامات دے ذریعے پورے کریسوں ۔ایف بی آر اے چیلنج قبول کیتے ۔نان فائلرز سانگے بکنگ خدمات تے ڈیوٹی کوں 0.6فیصد کیتا ویسی ۔ڈیماں دی تعمیر سانگے وی مختص کیتی گی رقم توں ودھ خر چ کریسوں ۔دیامر بھاشا تے مہمند ڈیماں دی تعمیر سانگے چیف جسٹس وزیراعظم دے فنڈز قائم ہن ۔ترقیاتی بجٹ تے 725ارب خرچ کریسوں ۔گزریل سال خرچ تھیونڑ آلی رقم دے مقابلے اچ ڈاہ فیصد ودھارا تھیسی ۔کراچی اچ انفراسٹرکچر دی تعمیر سانگے 50ارب روپے ڈتے ویسن ۔اے پبلک پرائیویٹ پارٹنر شپ دے تحت ہوسن ۔ پی ایس ڈی پی توں 575 ارب اتے ٹیکس اصلاحات دے ذریعے 100 ارب روپے دا انتظام کریسوں۔ دنیا اساں توں گزریل 30سال دے دوران اگی تے چلی گی اے ۔ماضی اچ جیرھے چنگے کم تھن او قائم رہسن ۔ ایندے اچ ڈیماں دی تعمیر اتے سی پیک منصوبے سانگے کم جاری رکھیسوں ۔اے ملک اللہ سئیں دی ڈت ہے ۔کوئی وہ ہے جو اے 27رمضان کوں وجود اچ آئے ملک دی ترقی سانگے بلاول بھٹو سمیت سارے شراکت دار ہوسن ۔عمران خان دی قیادت اچ اساں ملک کوں تبدیل کرنڑ ویندے پیوں ۔دنیا ایندے تے فخر کریسی ۔انہاں آکھیا جو ہائر ایجوکیشن سانگے منصوبیں کوں وی جاری رکھیا ویسی ۔