اسلام آباد۔ وفاقی وزیر ریلوے شیخ رشید احمد آکھیے جو ریلوے دا خسارہ ہک سال اچ مکا ڈیسوں،تفتان، کوئٹہ، گوادر اتے طورخم افغانستان سودھے ایران تئین ست ٹریناں چلیسوں،ریلوے کوں ٹریکنگ سسٹم تے گھن آسوں۔وزیراعظم ہاﺅس اچ راولپنڈی ایکسپریس اتے میانوالی تئیں ٹرین سروس دے افتتاح ویلھے خطاب اچ وزیر ریلوے شیخ رشید دا آکھنڑ ہا جو وزیراعظم دے گرین پاکستان منصوبے دے تحت ہر ڈویژن اچ چار نرسریاں بنڑائن،ریلوے دا چالہی توں بتالی ارب روپے دا خسارہ ہک سال اچ مکیسوں،سو ڈینہاں اچ بارہاں توں پندرہاں ٹریناں مال برداری کیتے فعال بنڑیسوں، گوادرکوں ریلوے ڈویژن بنڑا ڈتے جیندے کیتے 318 ایکڑ زمین گھندے پئے ہیں ، تفتان ۔ کوئٹہ، گوادر ۔ کوئٹہ اور طور خم افغانستان تے کم شروع تھی گئے، ایران تئیں ست ٹریناں گھن ونجنڑ دا ارادہ اے،پیونڑ دے پانڑی دے ست فلٹریشن پلانٹس دی ریلوے بورڈ منظوری ڈیسی جیندا ٹینڈر کیتا ویسی،16 اکتوبر کوں سندھ کوں ڈو ٹریناں دا تحفہ ڈیسوں۔ شیخ رشید آکھیے جو ساڈے تے آرام حرام اے،دادو، سیہون شریف، کوٹری، پنوں عاقل اتے گھوٹکی اچ نویاں ٹریناں چلیسوں۔ انہاں وزیر اعظم توں اپیل کیتی جو او کھاد اتے تیل دی نقل و حرکت کیتے متعلقہ محکمیاں کوں ہدایت ڈیون جو او ریلوے استعمال کرن ایندے نال ساکوں بہوں فیدہ تھیسی۔انہاں اعلان کیتے جوپشاورتوں کراچی تئیں رحمان بابا دے ناں توں ٹرین چلائی ویسی ۔
