اسلام آباد ۔ 28 ستمبر (اے پی پی) سیکرٹری خارجہ تہمینہ جنجوعہ آکھیے جو پاکستان امریکہ نال باہمی احترام اتے مشترکہ مفادات تے وسیع البنیاد تعلقات چاہندے ۔اے گالھ انہاں جنوبی و وسطی ایشیا کیتے امریکہ دی پرنسپل معاون وزیر خارجہ ایلس ویلز نال نیو یارک اچ اقوام متحدہ دی جنرل اسمبلی دے اجلاس ویلھے ہک ملاقات اچ آکھی۔ دفتر خارجہ دے ترجمان دے مطابق سیکرٹری خارجہ آکھیے جو پاکستان پر امن اتے مستحکم افغانستان چاہندے اتے ایں سانگے افغان حکومت نال رابطے اچ اے کیوں جو پاکستان افغانستان اچ ہک جامع سیاسی مصالحتی عمل کیتے اپنڑا کردار ادا کرنڑ کیتے وی اگو اگو اے۔انہاں افغان حکومت دے قابو توں باہرو علاقیاں، دہشتگرد گرد گروپاں اتے بارے وی پاکستان دی تشویش ڈسائی۔انہاں پاک افغان سرحد محفوظ بنڑاونڑ کیتے پاکستان دے اقدامات اتے مقبوضہ کشمیر اچ بھارتی فورسز دیان ودھددیاں انسانی حقوق دیاں خلاف ورزیاں بارے وی ڈسایا۔ معاون وزیر خارجہ ایلس ویلس امریکہ ولوں پاکستان دی نویں حکومت نال رل تے کم کرنڑ دی خواہش دا اظہار کیتا۔
