اقوام متحدہ ۔ 29 ستمبر (اے پی پی) وزیرخارجہ شاہ محمود قریشی مختلف معاشراں اتے ثقافتاں کوں سمجھنڑ سانگے آپس اچ رابطے ودھاونڑدی ضرورت تے زورڈیندے ہوئیں آکھیے جو مغربی ملکاں اچ اسلام دے حوالے نال پاتی گئی غلط فہمیاں تے پاکستان کوں گھاٹی تشویش ہے۔ اسلامی تعاون دی تنظیم (او آئی سی) دے وزراءخارجہ دے سالانہ مشاورتی اجلاس نال خطاب کریندے ہوئیں انہاں آکھیے جو پاکستان دنیا دے مختلف ملکاں اچ مذہب اسلام دے حوالے نال ودھدی ہوئی غلط فہمیاں کوں مکاونڑسانگے اہم کردار ادا کریندا پئے ،جیندے کیتے آپس اچ مذاکرات دی ضرورت ہے۔ وزیر خارجہ فلسطین اتے بھارتی مقبوضہ کشمیراچ بنیادی انسانی حقوق دیاں سنگین خلاف ورزیاں تے گھاٹی تشویش دا وی اظہارکیتے۔ انہاں آکھیے جو بھارتی مقبوضہ کشمیراچ قابض فوجیاں حالات تشویشناک حد تئیں خراب کرڈتے ہن اتے کشمیریاں آزادی اتے حق خود ارادیت حاصل کرنر سانگے 90 ہزار توں ودھ شہیداں دی قربانیاں ڈتیاں ہن جنہاں اچ بال اتے تریمتیں وی شامل ہن۔ انسانی حقوق بارے اقوام متحدہ دے ہائی کمشنر دی رپورٹ دا حوالہ ڈیندے ہوئیں انہاں آکھیے جو کشمیری عوام دے بنیادی انسانی حقوق دی سنگین خلاف ورزیاں کیتیاں ویندیاں پن ،جیندے اچ انصاف تئیں رسائی نہ ڈیونڑ وی شامل ہے،مقبوضہ کشمیراچ انسانی حقوق دیاں خلاف ورزیاں انصاف دا قتل ہن۔ انہاں اقوام متحدہ دی رپورٹ مطابق مقبوضہ کشمیر اچ انکوائری کمیشن بنڑاونڑ دی ضرورت دے سلسلے اچ او آئی سی اچ رابطہ گروپ قائم کرنڑ دے فیصلے کو ںخوش آئند آکھیے ،جیرھا جوکشمیری عوام دی پرامن جدوجہد حق خود ارادیت دی حمایت کرنڑ تے امت مسلمہ دے رہنماواں دا شکریہ ادا کیتے۔ گزریل ڈینھ اقوام متحدہ دی جنرل اسمبلی دے73ویں اجلاس دے موقع تے او آئی سی دے وزراءخارجہ دا نیویارک اچ اجلاس منعقد تھیا ،جیندے اچ مقبوضہ کشمیردے حوالے نال رابطہ گروپ دی رپورٹ دا جائزہ گھدا گیا۔ او آئی سی کشمیری عوام دے حق خود ارادیت گھنڑ سانگے پرامن جدوجہد دی بھرپور حمایت کریندی ہے۔ وزیرخارجہ اسلامی تعاون تنظیم دے رکن ملکاں دے نال آپس اچ تعلقات دے ودھارے دے حوالے نال پاکستان دے عزم دااعادہ کریندے ہوئیںآپس اچ رابطیاں دے ودھارے نال مستقبل اچ خوشحالی اتے امن وامان دے نظریے کوں ودھارا ونج جا سگدے۔
