اسلام آباد ۔ 21ستمبر (اے پی پی) وزیر اعظم عمران خان دا سعودی عرب اتے ابو ظہبی دا پہلا غیر ملکی دورہ متحدہ عرب امارات اچ رہنڑ آلے تارکین وطن پاکستانیاں سانگے بہوں خوشی دا ڈینھ ہئی تے سمندر پار پاکستانی اپنڑے نویں وزیراعظم کوں ڈیکھنڑ سانگے بے تاب ڈکھائی ڈتے ۔متحدہ عرب امارات اچ ہک ٹیلی کام کمپنی نال منسلک سینئر مینیجر اطہر فاروق آکھیے جو وزیراعظم دیاں ذمے واریاں سنبھالنڑ دے بعد اپنڑے پہلے غیر ملکی دورے سانگے سعودی عرب تے بعد اچ ابوظہبی دا انتخاب اتھاں رہنڑ آلی پاکستانی برادری سانگے بہوں مسرت دا باعث ہئی ۔اے دورہ ڈوہیں ملکاں دے نال پاکستان دے برادرانہ نیڑے تعلقات دا مظہر اے ۔اساڈے سابق کپتان دے دورے نال سعودی عرب تے متحدہ عرب امارات توں پاکستانی عوام دے دلاں اچ ڈوہیں ملکاں دے ہک ڈوجھے دے احترام تے دلی محبت دے جذبے دی عکاسی تھیندی اے ۔خلیج ٹائم دی رپورٹ دے مطابق عمران خان کھلے ذہن تے دلیرانہ فیصلے کرنڑ آلا رہنما اے تے پاکستانی عوام اپنڑے قائد توں وڈی توقع وابستہ کیتی ودی اے ۔انہاں آکھیا اساں اپنڑے قائد توں بد عنوانی دے خلاف عدم برداشت دی توقع کریندوں تے امید کریندوں جو او لٹی ہوئی دولت ہر قیمت تے پاکستان واپس گھن آسن ۔
