اسلام آباد ۔ 11ستمبر (اے پی پی) وزیرِاعظم عمران خان سابقہ قبائلی علاقیاں اچ لوکل گورنمنٹ دے نظام کوں گھن آونڑ سانگے کوششاں تیز کرنڑ دی ہدایت کریندے ہوئیں ایں گالھ اُتے زور ڈتے جو قبائلی علاقہ جات دی ترقی دے حوالہ نال قبائلی عوام دے فیصلیاں اتے صلاح کوں یقینی بنڑاونڑ سانگے لازمی ہے جو انہاں علاقیاں اچ تکھے توں تکھے لوکل گورنمنٹ سسٹم دا نفاذ کیتا ونجے ۔ وفاقی حکومت فاٹا کیتے ترقیاتی منصوبیاں سانگے درکار فنڈزتوں ودھ وسائل ڈیسی جڈانجو این ایف سی ایوارڈ اچ فاٹا دے ترقیاتی پیکیج دے حصول کیتے وی آپنڑاں کردار بھرپور طریقے نال ادا کریسی ۔ انہاں اے گالھ منگل کوں قبائلی علاقیاں (فاٹا) دے انضمام دے حوالے نال اعلیٰ سطح دے اجلاس دی صدارت کریندے ہوئیں آکھی۔ اجلاس اچ وزیرِ خزانہ اسد عمر، وزیرِ قانون ڈاکٹر فروغ نسیم، وزیر برائے مذہبی امور نور الحق، وزیرِاعظم دے مشیر شہزاد ارباب، گورنر خیبرپختونخوا شاہ فرمان، وزیرِ اعلیٰ محمود خان، متعلقہ محکمیاں دے وفاقی تے صوبائی سیکرٹریز اتے بئے افسراں شرکت کیتی۔ اجلاس اچ قبائلی علاقہ جات دے انضمام بارے اگوہیں اتے ہنڑ تئیں چاتے ونجنڑ آلے انتظامی تے قانونی اقدامات دا جائزہ گھندے ہوئیں فاٹا انضمام اتے قبائلی عوام دے حقوق دے تحفظ سانگے اہم فیصلے کیتے گئے ۔ ایں موقعے تے وزیراعظم ایں گالھ اُتے زور ڈتا جو قبائل دے رسم و رواج کوں سامنڑیں رکھیندے ہوئیں نویں نظام دے نفاذ کوں قابل عمل بنڑایا ونجے اتے نویں نظام دے اطلاق اچ قبائلی عوام دی صلاح کوں یقینی بنڑایا ونجے ۔ انہاں ہدایت کیتی جو قبائلی علاقیاں دے نوجواناں کیتے روزگار دی فراہمی دے بئے موقعے یقینی بنڑائے ونجن اتے ایں گالھ دا خاص خیا ل رکھیا ونجے جو انتظامی اقدامات پاروں کئی فرد بے روزگار نہ ہووے۔ وزیراعظم آکھیا جو قبائلی علاقیاں دے عوام کیتے سکولاں، کالجاں اتے یونیورسٹیاں اچ مختص کوٹہ متاثر نہ تھیوے ۔
