اسلام آباد ۔ 10ستمبر (اے پی پی) کابینہ دی اقتصادی رابطہ کمیٹی (ای سی سی ) کساناں کوں سُکھ ڈیونڑ کیتے ہک لکھ میڑک ٹن یوریا کھاددرآمد کرنڑ اتے فی بوری 960 روپے رعایت ڈیونڑ دا فیصلہ کیتے جڈانجو گیس دیاں قیمتاں بارے فیصلہ موخر کرڈتا گئے۔ کمیٹی ایل پی جی گیس سلنڈرز دیاں قیمتاں اچ ودھ سارے ودھارے اُتے کارروائی کریندے ہوئیں قیمتاں کوں معمول اُتے گھن آونڑ سانگے صوبائی حکومتاں نال رابطے دی سفارش کرڈتی ، ایں بارے حکومت باقاعدہ نظام ڈیسی ۔ سنوار کوں وفاقی وزیر اطلاعات و نشریات چوہدری فواد حسین ای سی سی اجلاس دے حوالے نال بریفنگ ڈیندے ہوئیں ڈسایا جو اقتصادی رابطہ کمیٹی دے اجلاس اچ اہم فیصلے کیتے گئے ہن ، معشیت دی مجموعی صورتحال، بجلی ،گیس دے معاملیاںوزیر خزانہ اسد عمر پارلیمان دے سامنڑیں رکھن۔ انہاں ڈسایاجو ای سی سی کساناں کوں سُکھ ڈیونڑ کیتے ہک لکھ میٹر ٹن یوریاکھاد برآمد کرنڑ دی منظوری ڈے ڈتی ہے ۔ ایں ویلے ملک اچ کھاد دی لوڑ 5.833ملین ٹن ہے،گزیل سال 5.862 ملین ٹن یوریا کھاد دی لوڑہئی ، یوریا کھاد درآمد کرنڑ دے بعد فی بوری قیمت75 25 روپے دی پوسی ، ایند اچ جو اضافی 960 روپے ہن او بار حکومت برداشت کریسی ایندے نال نال ہک ایں طرح دا نظام وی ڈتا گئے جو ملک اچ کھاد دے پلانٹس کوں گیس ڈتی ونجے تانجو کھاد دی پیداوار ودھائی ونج سگے ، جیندے نال کساناں دی لوڑ پوری تھی ویسی ۔ انہاں آکھیا جو وزیراعظم عمران خان دی اقتصادی پالیسی اچ کسان اہم جزو ہن ایں سانگے حکومت کہیں وی طور تے ایں طرح دا قدم کائناں چیسی جیندے نال کساناں کوں کئی نقصان تھیوے ۔ انہاں ڈسایا جو ای سی سی اچ گیس دیاں قیمتاں دے تعین دے معاملے دا وی جائزہ گھدا گئے ۔ 2013 ءاچ جڈاں حکومت قائم تھئی ہئی تاں اوں ویلھے گیس دے شعبے اچ ہک روپے دا وی خسارہ کائناں ہئی جڈانجو گزریل پنج سالیں اچ 156ارب دا خسارہ چھوڑ تے گئی ہے جیہڑا جو بہوں حد تئیں گیس دی چوری پاروں تھئے ۔ جئیں ویلے شاہد خاقان عباسی خوشخبری ڈیندے پئے ہن جو معاہدے کیتے ہن ایندے بعد ہر پاسے ہریالی ہوسی جڈانجو حقیقت تاں اے ہے جو گیس دا شعبہ تباہی دا شکار ہے ،سارے ملک اچ 40فیصد لوگ پائپ لائناں دے ذریعے گیس استعمال کریندے پن جڈانجو باقی ایل پی جی سلنڈز دی گیس استعمال کریندے ہن ، سلنڈر دی قیمت اچ گزریل کجھ ہفتیاں اچ 70فیصد ودھارا تھئے ،ای سی سی وفاقی حکومت کوں آکھے جو او صوبیاں کوں ہدایت کرے جو ایل پی جی گیس سلنڈرز دیاں قیمتاں اچ ودھ سارے ودھارے اُتے کارروائی کریندے ہوئیں قیمتاں کوں معمول اُتے گھن آوے ۔انہاں آکھیا جو وزیراعظم عمران خان دی بنیادی سوچ وی اے ہے جو اساں غریب ترین آدمی کوں نقصان کائنی ڈیونڑ اں ، وزیراعظم دی ایں سوچ دے تحت ای سی سی فیصلہ کیتے جورعایت دا نظام وضع کیتا ویسی ۔
