پاکستان نال مذاکرات توں مکر تے بھارت منفی سوچ ڈکھائی اے، وزیراطلاعات و نشریات فواد حسین چوہدری

اسلام آباد ۔ 22 ستمبر (اے پی پی) وزیر اطلاعات و نشریات چوہدری فواد حسین آکھیے جو پاکستان نال مذاکرات توں مکر تے بھارت منفی سوچ ڈکھائی اے، بھارت دے مکرنڑ نال پاکستان دا مثبت اتے امن پسندانہ امیج سامنڑے آئے جڈاں جو لگدے بھارت اچ مذاکرات دے حوالے نال سوچ ونڈیج گئی اے، کئی ایندے حامی ہین اتے کجھ مخالف بھل ایں مکرنڑ نال بھارت دا چہرہ ضرور بے نقاب تھئے،پاکستان کرتارپورہ بارڈر کھولنڑ کوں تیار اے، امریکی وزیر خارجہ دے دورہ توں بعد امریکا دی پاکستان بارے سوچ بدلی اے،سعودی عرب وی سی پیک اچ رلنڑ چاہندے،ساکوں اے ڈیکھنڑے جو جنگ کروں یا غربت نال بھڑدے لوکاں کوں سنواروں،ملکی ترقی، خوشحالی ،دفاع اتے استحکام کیتے مسلح افواج، حکومت اتے عوام دی سوچ ہکو جھیںاے۔ ہک نجی ٹی وی کوں انٹرویو ڈیندے ہوئیں فواد چوہدری دا آکھنڑ ہا جیکر اساں امن دو ہتھ ودھیندے پئے ہین تاں بھارت کوں وی ایندا مثبت جواب ڈیونڑ چاہیدے،ثابت تھی گئے جوبھارت امن مذاکرات نئیں چاہندا بھل اساں نجوت سنگھ سدھو کوں جیہڑا مانڑ ڈتے پوری ڈنیا ڈیکھ ڈتے، آرمی چیف یاتریاں کیتے کرتار پورہ بارڈر کھولنڑ دا اعلان کیتے۔ انہاں آکھیے جو امریکا دا پاکستان بارے تاثر بدلدا پئے، پومپیو دے دورہ توں بعد وزیر خارجہ شاہ محمود قریشی دے دورہ امریکا اتے اقوام متحدہ دی جنرل اسمبلی اجلاس اچ شرکت ہک نویں دور دا آغازڈیسی اتے شاہ محمود قریشی دی کئی ملکاں دے وزرائے خارجہ نال ملاقات تھیسی۔انہاں آکھیے جو پارلیمنٹ دا کم پالیسی سازی اے، وزیراعظم حالات معمول تے گھن آونڑ دی پالیسی ڈتی اے،سی پیک نال گوادر اتے کراچی اقتصادی سرگرمیوں دا مرکز بنڑ ویسین،سعودی عرب وی ساڈے کولوں سرمایہ کاری کرنڑ کوں تیار اے۔فواد چوہدری آکھیے جو عمران خان ڈیل ڈیونڑ آلے ہین ناں ڈھل ڈیونڑ آلے،نوازشریف اتنے اہم نئیں جو انہاں کیتے سعودی عرب یا بیا کوئی اتنا سِر کھپاوے، ایون فیلڈ ڈو جمع ڈو دا معاملہ اے، ایندے بارے نیب دا سیکشن 9 واضح اے،سزا معطلی دی سمجھ نئیںآندی پئی،اے نسے آکھ سگدے جو نیب کوئی کمی چھوڑی ہوسی۔اے عجیب گالھ اے زرداری تو پچھو پیسے کتھو آئن تاں او آہدے جو بینظیر دی قبر دا ٹرائل نوے کر سگدے،نوازشریف کوں ہتھ پاو تاں او آہدن جو اےوڈا ظلم اے کہ میں ایٹمی دھامکے کیتن، ترائے واری حکومت کیتی اے مین کولوں پچھدے او؟ شریف خاندان دی سیاست مک چکی اے ہنڑ انہان دا جیل آونر ونجنڑ لگیا راہسی، ایندا ضمنی انتخابات تے کوئی اثر نہ پوس،فکر نہ کرو اسحاق ڈار، حسن اتے حسین نواز وی تیکھے قانون دی پکڑ اچ آ ویسن، امید اے جو برطانیہ وی تعاون کریسی۔انہان آکھیے جو افغانیاں اتے بنگالیاں کوں شہریت ، بیرون ملک پاکستانیاں دے حوالے نال پالیسیاں قومی مفاد دے مطابق بنڑائیاں ویسن۔