ابوظہبی۔ 18 اکتوبر (اے پی پی)ابوظہبی ٹیسٹ اچ پاکستان کینگروز کوں ہراونڑ دا جال وُنڑ گھدے اتے میچ جیتنڑ کیتے 538رنز دا پہاڑ ہدف ڈے ڈتے،جواب اچ آسٹریلیاڈوجھی اننگ اچ ہک وکٹ تے 47رنزبنڑا گھدن،پاکستان ڈوجھی اننگ 400رنز 9 کھیڈاڑی آوٹ تے ڈکلیئر کر ڈتی۔پاکستان ولوں بلے باز بابر اعظم 99، سرفراز احمد 81رنز، فخر زمان 66اتے اظہر علی 64 رنزبنڑائن۔حالی میچ دے ڈو ڈینہہ باقی ہین۔میچ دے تریجھے ڈینہہ پاکستان ٹیم اپنڑی اننگز 144 رنز 2 کھلاڑی آﺅٹ تے ولا شروع کیتی اتے چار سو رنز بنڑاونڑ توں بعد 9کھیڈاڑی آوٹ تے ڈکلیئر کر ڈتی۔ پاکستان ولوں حارث سہیل 17،اظہر علی64 رنز، اسد شفیق 44 رنزبنڑائن جڈاں جو بابر اعظم کپتان سرفراز احمد نال رل تے چھیویں وکٹ تے 133 رنزجوڑن اتے بابر اعظم 99 رنزتے نروس نائٹیز دا شکار تھین اتے اپنڑے کیریئر دی پہلی سنچری نئیں بنڑا سگے۔کپتان سرفراز احمد 81، بلال آصف15اتے یاسر شاہ 4 رنزتے آﺅٹ تھین۔جواب اچ آسٹریلیا ڈوجھی اننگ اچ ہک وکٹ تے 47رنز بنڑا گھدن،شان مارش کون چار رن تے میر حمزہ پویلئن بھیجے،ایرون فنچ 24اتے ٹریوس ہیڈ 17رنز نال وکٹ تے کھڑن۔ آسٹریلیا کوں جیتنڑ کیتے بئے نوں وکٹاں تے 491رنز لوڑھ ہین جوں جو پاکستان کوں نوں وکٹاں گھنڑن۔
