اسلام آباد ۔ 30 اکتوبر (اے پی پی) وزیر خزانہ اسد عمر آکھیے جو حکومت برآمدات دے ودھارے، بیرونی خسارے تے قابو پاتے ملکی معیشت کوں پیریں تے کھڑے کرنڑ چاہندی اے،ٹھوٹھابھن تے غیرملکی قرضیاں تے انحصار کم کرنڑے،اپوزیشن تجویزاں ڈیوے۔ قومی اسمبلی اچ الویندے ہوئیں وزیر خزانہ اسد عمر دا آکھنر ہا جو اساں ملک کوں معاشی بحران توں کڈھ تے اپنڑے پیرین کھڑا کرنڑ چاہندے ہیں، امید اے جو اپوزیشن معاشی مسائل دے حل کیتے چنگیاں تجویزاں ڈیسی، مسلم لیگ ن کوں پتا اے جو او ملک کیہڑے حال اچ چھور گین،بیرونی خسارے نال معیشت متاثر تھئی‘ تجارتی خسارہ 17 ارب ڈالرتوں ودھ تے 35 ارب ڈالرتئیں پج گئے، حکومتی قرض پاروں 2017ءاچ روپے دی ودر گھٹنر شروع تھئی ، حکومتی اخراجات ودھین، گزڑیل ڈو سالں اچ سب توں ودھ 1200 ارب روپے دے نوٹ چھاپے گئن تاں حالات بئے خراب تھین، تہوں ضمنی بجٹ ڈیونڑاں پئے، اسان اخراجات اتے ٹیکس گھٹائن ،بیل آﺅٹ پیکج دے بغیر معیشت ایں بحران توں نئیں نکل سگدی،اساں آئی ایم ایف، سعودی عرب اتے بئے دوست ملکاں نال الوائے،سعودی عرب نال ترائے ارب ڈالر سٹیٹ بنک اچ رکھنڑ دی مفاہمت دی یادداشت تے دستخط کیتن،ترائے سال کیتے 9 ارب ڈالردا تیل ڈیونڑ دی مفاہمت دی یادداشت تے دستخط کیتن تاں جو آئی ایم ایف تے گھٹ توں گھٹ انحصار کرنڑاںپووے۔انہاں آکھیے جو گیس، بجلی اتے تیل دیاں قیمتاں اچ غریباں تے گھٹ توں گھٹ بوجھ رکھیے، ضمنی بجٹ اچ امیراں تے ٹیکس لائن،پاکستان تجارتی خسارے بالخصوص چین نال باہمی تجارتی خسارے کوں گھٹاونڑ چاہندے، این سانگے چین وی ساڈے نال متفق اے،بنکنگ سسٹم دی بہتری،صنعتی زونز اچ غیر ملکی سرمایہ کاری، چینی کمپنیاں نال شراکت داری،چھوٹے کاروبار‘ زراعت اتے ہاﺅسنگ کیتے توجہ ڈیندے پئے ہیں۔مولانا عبدالواسع دے بیان تے واضح کریندے آکھیا جو جنرل نیازی دی عمران خان نال کوئی رشتہ داری کائنی،جڈاں جو 1971ءاچ میرے والد چھمب جوڑیاں سیکٹر اچ تعینات ہن جئیں چھمب جوڑیاں سیکٹر اچ بھارتی علاقے تے قبضہ کیتے ، او اوں ویلھے بنگلہ دیش تعینات کائنا ہن، چنگاں ہوسی جو ذاتیات تے گالھ کرنڑ توں پہلے اپنڑا ریکارڈ وی درست کر گھدا ونجے۔
