اسلام آباد ۔ 4 اکتوبر (اے پی پی) صدر مملکت ڈاکٹر عارف علوی خواتین ارکان پارلیمنٹ اتے میڈیا تے زور ڈتے جو او معاشرے اچ بریسٹ کینسر متعلق آگاہی پیدا کرنڑ سانگے کردار ادا کرن ۔ حکومتی تے اپوزیشن خواتین ارکان پارلیمنٹ نال خطاب کریندے ہوئیں انہاں آکھیا جواکتوبر بریسٹ کینسر متعلق آگاہی دا مہینہ ہے اتے معاشرے اچ لیڈرز دی حیثیت نال تریمت ارکان پارلیمنٹ تے باری ذمے واری لگدی اے جو او ایں بیمار ی بارے معاشرے اچ شعور اجاگر کرن۔ صدر مملکت ایں مرض وختی تشخیص، روک تھام اتے علاج دی ضرورت تے زور ڈیندے ہوئیں اینکوں اعلیٰ ترجیح قرار ڈتا یا۔ انہاں آکھیا ایں حوالے نال خواتین اپنڑاں جائز ہ خود گھنن تے رہنمائی حاصل کرن ۔ ایں مرض دی تشخیص اتے علاج نہ کیتا ونجے تاں اے جسم دے ڈوجھے حصے تئیں کھنڈ سگدے ۔صدر مملکت آکھیا او سارے ٹی وی چینل کوں خط لکھسن جو او تریمت رہنماواں ،سماجی کارکناں ،تریمت کھلاڑیاں تے ممتاز شخصیات کوں اپنڑے مارننگ ٹاک شوز اچ سڈن تے بریسٹ کینسر دے حوالے نال آگاہی مہم چالون ۔ معاشرے اچ خواتین کو ںمقام ڈیونڑ ریاست دی ذمے واری اے ۔ ایں موقع تے وفاقی وزیر بین الصوبائی رابطہ ڈاکٹر فہمیدہ مرزا آکھیا جو صدر مملکت خواتین کوں درپیش سارے مسلیں تے گال کیتی ، خواتین کوں درپیش مسلیں کوں سامنڑے رکھیندے ہوئیں میں بحیثیت سپیکر قومی اسمبلی وومن پارلیمنٹری کاکس تشکیل ڈتا ہئی ۔ ڈاکٹر فہمیدہ مرزا آکھیا جو انہاں خودوی بریسٹ کینسر جیہوجے مرض دا مقابلہ کیتے ، بریسٹ کینسر توں بچنڑ دی شرح کافی بلند اے لیکن ایں حوالے نال آگاہی وڈی اہمیت رکھیندی اے ۔انہاں آکھیا اے بیماری جنوبی ایشیاءبالخصوص پاکستان اچ عام ہے جیں دی وجہ ایں مرض متعلق آگاہی نہ ہوونڑ ہے ۔ وفاقی وزیر برائے نیشنل ہیلتھ سروسز عامر محمود کیانی، وفاقی وزیر اطلاعات و نشریات فواد حسین چوہدری، ارکان سینیٹ اتے خواتین ارکان پارلیمنٹ وی ایں موقع تے موجود ہن ۔
