اسلام آباد ۔ 18 اکتوبر (اے پی پی) اقوام متحدہ اچ پاکستان دی مستقل مندوب ڈاکٹر ملیحہ لودھی غربت دے خاتمے سانگے پائیدار ترقیاتی اہداف دے حصول سانگے نویں عزم دی ضرورت تے زور ڈیندے ہوئیں آکھیے جو عالمی صورتحال 2030ءدے ترقیاتی اہداف دے حصول سانگے سازگار کائنی ۔ انہاں اے گال اقوام متحدہ دی جنرل اسمبلی دی ڈوجھی کمیٹی نال خطاب کریندے ہوئیں آکھی۔اے کمیٹی اقتصادی اتے مالیاتی امور کوں ڈیکھدی اے ۔ کمیٹی نال خطاب کریندے ہوئیں ڈاکٹر ملیحہ لودھی آکھیا جو عالمی شراکت داری اچ دراڑاں آندیاں پن، بین الاقوامی مالیاتی وسائل تئیں رسائی محدود تھیندی پئی اے ،ایندے نال نال سیاسی عزم اچ وی گھٹکی تھی اے ۔ انہاں آکھیا جو دنیا ہزاراے ترقیاتی اہداف دے عالمی ایجنڈے توں ہنڑ تئیں وی بہوں پرے ہے ۔ ڈاکٹر ملیحہ لودھی آکھیا جوہزاریہ ترقیاتی اہداف اتے سماجی و اقتصادی ترقی دے بئے اہداف دے حصول سانگے ودھ سارے جوش جذبے تے سیاسی عزم دا مظاہرہ کرنڑاں ہوسی ۔انہاں آکھیا ویراعظم عمران خان دی قیادت اچ حکومت جیرھی ترجیحات دا تعین کیتے او 2030ءدے عالمی ایجنڈے دے حصول دے تقاضیں دے عین مطابق اے ۔ حکومت پاکستان معیشت دے احیائے نو، نینگران کوں روزگار دی فراہمی، رہائشی سہولتاں ، ادارہ جاتی اصلاحات اتے سیاحت و تعلیم تئیں رسائی جیہاں بنیادی سہولتاں دی فراہمی تے کم کریندی پئی اے ۔
