قوم ”کلین اینڈ گرین پاکستان“ مہم اچ ودھ کے حصہ پاوے، وزیراعظم عمران خان

اسلام آباد ۔ 8 اکتوبر (اے پی پی) وزیراعظم عمران خان ”کلین اینڈ گرین پاکستان“ مہم دا افتتاح کر ڈتے، انہاں دا آکھنڑ ہا جو قوم ”کلین اینڈ گرین پاکستان“ مہم اچ ودھ کے حصہ پاوے، قومی سطح پر صفائی تے تحریک دا باقاعدہ اتے عملی آغاز 13 اکتوبر کوں تھیسی،پنجویں جماعت تئیں نصاب اچ صفائی اتے ماحولیات سانگے ابواب شامل کریسوں، تحصیل سطح تے صفائی دے انعامی مقابلے تھیسن، کلین اینڈ گرین پاکستان سکاﺅٹس دا اندراج کیتا ویسی،پنج سال اچ ڈاہ ارب درخت لیسوں، ماحولیاتی تبدیلیاں دے خلاف اے سب توں وڈی مہم ہوسی۔ وزیراعظم آفس اچ صاف اتے سرسبز پاکستان مہم دی افتتاحی تقریب نال خطاب کریندے ہوئیں انہاں آکھیے جو اساں مدینہ دی ریاست دے اصولاں تے پاکستان کوں اگو تے گھن تے ٹرنڑے،جتھاں انصاف، فلاحی ریاست اتے میرٹ دی بالادستی ہئی،صفائی کون ادھا ایمان آکھیا گئے ، بھل ساڈے ملک اچ الٹا نظام اے اساں صفائی تے کوئی توجہ نئیں ڈیندے، اسلام آباد دیاں کچی آبادیاں اچ گنداے،مارگلہ دے پہاڑی نالے گندے تھی گین، دریائے راوی وی گندہ نالہ بنڑ گئے،لاہور اچ سموگ ودھدا پئے،ایں سانگے صاف تے سرسبز پاکستان مہم اچ پورے ملک کوںرلایا ویسی تاں جو گندگی، تعفن پاروں بالاں اتے آونڑ آلے مستقبل کوں آلودگی اتے بیماریاں توں بچا سگوں۔وزیراعظم آکھیا جو ایں مہم اچ ہوا، دریا، گندگی، فضلہ سودھے ہر مسلے تے قابو پیسوں،گند نال بجلی بنڑاونڑ دے منصوبے شروع کریسوں، گندے پانڑی کوں ولا قابل استعمال بنڑا تے زراعت دے کم لایا ویسی اتے اے مہم پنج سال جاری راہسی، ساکوں لوکاں کوں نویں سوچ ڈیونڑی اے، ایندے کیتے بالاں دے تعلیمی نصاب اچ صفائی اتے ماحولیات دے پنجویں جماعت تئیں مضمون پاتے ویسن جو صفائی کتنی اہم اے۔ انہاں آکھیے جو پورے ملک اچ گند کٹھا کرنڑ کیتے انجھ جاہیں بنڑایاں ویسن، اتے صفائی مہم دے جائزہ کیتے مانیٹرنگ ٹیماں بنڑائیاں ویسن،ضلع اتے تحصیلاں اچ صفائی مقابلے کرویسوں اتے جیتنڑ آلیاں کوں انعام ڈتے ویسن،خراب صورتحال تے سزا وی ڈتی ویسی۔وزیراعظم آکھیے جو حکومتی سطح توں علاوہ عوام دی شرکت وی بذریعہ واٹس ایپ رکھی ویسی۔گھر گھر عوامی مہم وی نال چلسی،میڈیا، شوبز اتے کھلاڑیاں اچوں سفیر بنڑیسوں، علماءکرام توں وی مدد گھدی ویسی، اساں ملک اچ بیت الخلا دی کمی اتے صفائی کیتے 2023ءتئیں کم کریسوں تاں جو سیاحت کوں وی ودھنڑ دا موقع ملے، ایندے کیتے سارے وسائل اتے اخراجات وفاق ڈیسی۔ایں موقع تے وزیراعظم مہم بارے صحافیان کون سوالاں دے جواب وی ڈتن۔