وزیراعظم عمران خان داقوم توں خطاب

اسلام آباد ۔ 24 اکتوبر (اے پی پی) وزیراعظم عمران خان کرپشن مکاونڑ اتے بدعنوان بندیاں دا کڑا احتساب کرنڑ دا اعادہ کریندیں ہوئیں آکھیا جو کوئی جو مرضی کر گھنے احتساب ضروری تھیسی،کن کھول کراہیں سنڑ گھنو کہیں کوں این آراو کائنا ملسی۔کجھ جماعتاں احتساب دا عمل رکواونڑ سانگے دباﺅ پیندی پن،کہیں کرپٹ بندے کوں کائنا چھڑیساں،عوام نال کیتا وعدہ جو کرپٹ بندیاں کوں جیلاں اچ سٹیسوں،کرپشن کوں برداشت کرنڑ دی قیمت قوم کوں ڈیونڑی پمدی اے،قوم بلکل فکر نہ کرے،تھوڑی دیر سانگے اوکھ برداشت کرنڑی پمسی،پاکستان کوں کرپشن دے کینسر مفلوج کر ڈتے،اساں ایں کرپشن دے کینسر کوں کڈھیندے پئیوں،کرپشن دا خاتمہ نال ملک بہوں تکھے اوگوں ودھسی،سعودی عرب توں زبردست پیکیج ملیے،بئے دوست ملکاں نال وی گالھ تھیندی پئی اے،قوم کوں جلدی بئی خوشخبری سنڑیساں،سرمایہ کاری،ترسیلات زر اتے برآمدات اچ ودھارے سانگے موثر اقدامات کریندے پئیوں،غریب اتے کمزور طبقیاں دی فلاح سانگے خصوصی پیکیج دا اعلان جلدی کیتا ویسی،پاکستان جلدی قرض گھنڑ دی بجائے قرض ڈیونڑ آلے ملکاں دی صف اچ رل ویسی،یمن اچ لڑائی نال پوری مسلم امہ کوں تکلیف اے،اساں ڈو اسلامی ملکاں اچ ثالثی اتے مسلماناں کوں کٹھا کرنڑ دی کوشش کریندے پئیوں۔اے گالھیں انہاں بدھ دی رات قوم نال خطاب کریندیں ہوئیں آکھی۔وزیراعظم عمران خان خطاب دے شروع اچ آکھیا جو او قوم کوں خوشخبری سنڑاونڑ چاہندن۔اللہ دا شکر ادا کرینداں جو سعودی عرب توں زبردست پیکیج مل گئے اتے ایںپاروں قرضیاں دا بوجھ وی گھٹ رہ گئے