اسلام آباد ۔ 19 اکتوبر (اے پی پی) وزیراعظم عمران خان سعودی فرمانروا شاہ سلمان بن عبدالعزیز دی دعوت تے ڈو ڈینھ دی ”مستقبل سرمایہ کاری اقدام“ کانفرنس اچ شرکت سانگے 23 اکتوبر کوں ریاض دا دورہ کریسن ۔ کانفرنس اچ کاروباری شخصیات، سرمایہ کار، کارپوریٹ دے شعبے دے ممتاز رہنما، ہائی ٹیک انڈسٹری اتے ذرائع ابلاغ دے اہم اداریں دے نمائندگان شرکت کریسن ۔جمعے کوںترجمان دفتر خارجہ اپنڑائے بیان اچ ڈسائے جو کانفرنس جیں کوں” صحرااچ ڈیووس“ قرار ڈتا گے پہلے ڈینھ وزیراعظم عمران خان دی شرکت دا مقصد پاکستان دی اقتصادی اتے سرمایہ کاری صلاحیت دے نال نال آندے پنج سالاں اچ ملک دے حوالے نال اپنڑے وژن کو ں اجاگر کرنڑاں اے ۔ وزیراعظم ایں موقع تے شاہ سلمان اتے ولی عہد محمد بن سلمان نال وی ملاقاتاں کریسن جیں اچ سانجھی دلچسپی دے امور تے گال مہاڑ کریسن۔بیان اچ آکھیا گے جو اے کانفرنس پاکستان اچ سرمایہ کاری دے خواہش مند اہم کاروباری رہنماواں دے نال ملاقات دا موقع ڈیسی ۔ پہلی کانفرنس گزریل سال منعقد تھی ہئی جیں اچ 90 ملکاں دے 3800 لوکاں شرکت کیتی ہئی ۔ ایں سال کانفرنس اچ وڈی تعداد اچ ممتاز شخصیات دی شرکت متوقع ہے۔بیان اچ آکھیا گے جو وزیر اعظم عمران خان دی کانفرنس اچ شرکت سعودی سلطنت ولوں بین الاقوامی کاروباری اتے سرمایہ کاری دا ابھرداہویا محور بنڑنڑ دیاں کوششاں دے نال اساڈی یکجہتی دی غمازہے۔
