اسلام آباد ۔ 25 اکتوبر (اے پی پی) وزیراعظم عمران خان چینی قیادت دی دعوت تے 2 توں 5نومبر تئیں چین دا سرکاری دورہ کریسن جیرھا جو اگست 2018ءاچ وزارت عظمیٰ دا منصب سنبھالنڑ دے بعد انہاں دا چین دا پہلا دورہ ہوسی ۔وزیر خارجہ شاہ محمود قریشی سمیت اعلیٰ سطح دا وفد دی ونہاں دے نال ہوسی ۔ترجمان دفتر خارجہ ولوں خمیس کوں جاری بیان دے مطابق اے دورہ پاک چین سدابہار سٹریٹجیک شراکت داری نال عبارت نیڑے تے روایتی گرمجوشی دے حامل تعلقات کوں نشابر کریندے ،اپنڑے دورے اچ وزیراعظم چینی صدر شی جنگ پنگ تے وزیراعظم لی کی کیانگ نال ملاقاتاں کریسن ۔ڈوہیں پاسے سانجھے تعلقات دے وسیع تر امور دا جائزہ گھنسن ۔ایں موقع تے شعبے اچ بہوں سارے معاہدے تے تعاون دیاں یاداشتاں تے وی دستخط تھیسن ۔بیجنگ دے اپنڑے دورے دے بعد وزیراعظم پہلی واری چائنہ انٹر نیشنل امپورٹ ایکسپو اچ شرکت سانگے شنگھائی دا دورہ کریسن جتھاں پاکستان وسیع تر برآمدی مصنوعات دی نمائش کریندا پئے۔ وزیراعظم عمران خان ایکسپو دے افتتاح دے موقع تے کلیدی مقرر ہوسن ۔ شنگھائی فورم دے موقع تے وزیراعظم بئے عالمی رہنماواں نال وی ملاقاتاں کریسن ، او چینی مالیاتی اتے کارپوریٹ شعبے دے رہنماواں نال وی ملاقات کریسن ۔بیان اچ آکھیا گے جو پاکستان تے چین وچال مختلف شعبے اچ نیڑے تعاون دے حامل سانجھی دلچسپی اتے مشترکہ اصولاں دی بنیاد تے روایتی طور تے نیڑے معاون تے دوستانہ تعلقات استوار ہن ۔ڈوہیں ملک علاقائی امن تے استحکام دے ودھارے تے اقتصادی تعاون سانگے باقاعدہ سٹریٹجیک رابطے استوار کیتے ہوئے ہن ۔پاکستان تے چین وچال معاشی تے صنعتی تعاون کوں پاک چین اقتصادی راہداری دے قیام دے بعد نمایاں طور تے وسعت ملی ۔وزیراعظم دے دورے نال ڈوہیں ملکاں دے موجودہ سٹریٹجیک تعلقات کوں مزید تقویت مل ویسی تے ڈو پاسے شراکت داری کوں وسعت ڈیونڑ دے نویں رستے کھل ویسن ۔
