اسلام آباد ۔20 اکتوبر(اے پی پی)حریت کانفرنس اتے جموں کشمیر تحریک حق خود ارادیت انٹرنیشنل دے وفد وزیر اطلاعات چوہدری فواد حسین نال ملاقات کیتی، ایں موقع تے وزیر اطلاعات آکھیا جو پاکستان کشمیریاں دے خود ارادیت دے حق دا ساریں توں وڈا وکیل اے ،پاکستان ہر فورم تے کشمیریاں دے حق خود ارادیت دی جدوجہد کوں اجاگر اتے بھارتی ظلم کوں بے نقاب کریندا رہسی ۔ہفتے کوں جاری پریس ریلیز دے مطابق حریت کانفرنس اتے جموں کشمیر تحریک حق خود ارادیت انٹرنیشنل دے وفد وزیر اطلاعات نال ملاقات کیتی ۔وفد اچ راجہ نجابت حسین ، عبدالحمید لون اتے بئے شامل ہن ۔ وزیر اطلاعات آکھیا جو مقبوضہ کشمیر اچ بھارتی ریاستی دہشتگردی دی ودھ ساری مذمت کریندوں ،کشمیریاں دے صبر و استقلال توں بھارتی ظلم ہر گئے۔۔وفد حکومت ولوں کشمیریاں دی ودھ ساری حمایت دی تعریف کیتی ۔
