ملتان۔25 اکتوبر(اے پی پی )گورنر پنجاب چودھری محمد سرور آکھیے جو پاکستان کوں ایں وقت بجلی بحران دا سامنڑاں اے ،جیں نال نبڑنڑ سانگے اساں ساریں کوں رل تے کردار ادا کرنڑاں چاہیدے،اے گال انہاں نشترمیڈیکل یونیورسٹی دے پہلے کانووکیشن نال خطاب کریندے ہوئیں آکھی ،ایں موقع تے انہاں ساریاں یونیورسٹیاں کوں ہدایت کیتی جو او ہک سال دے اندر توانائی تے منتقل تھی ونجن،انہاں آکھیا ساریاں یونیورسٹیاں کوں اپنڑے طالب علماں سانگے پیونڑ دے صاف پانڑیں دی فراہمی کوں یقینی بنڑاونڑاں ہوسی ، پیونڑ دا صاف پانڑیں تاں ہر شہری کوں ملنڑاں چاہیدے ،گورنر پنجاب چانسلر دی حیثیت نال کانو وکیشن دے دوران تاڑیاں نہ مارنڑ دی روایت ختم کرنڑ دا اعلان وی کر ڈتا ۔انہاں آکھیا کانووکیشن اچ جیرھے طالب علماں تے طالبات کوں میڈل ملدے پن تے کجھ بالڑیاں چار چار ،پنج پنج میڈل وصول کریندیاں پیاں ہن تا ں میں ڈیکھدا پیاں ہم جو خوشی دے ایں ماحول اچ میں وی تے سارے چپ بیٹھے ہن تے خوشی دا اظہار کائناں کریندے پے ہن ، میں وائس چانسلر صاحب توں پچھیا جو ایندی کیا وجہ اے تاں انہاں ڈسایا جو کانووکیشن دے پروٹوکول اتے روایت دے مطابق تاڑیاں کائنی ماریاں ویندیاں ،انہاں آکھیا میں بحیثیت وائس چانسلر اعلان کریندا ں جو اج توں اے روایت ختم کیتی ویندی پئی اے ،طلبا تے طالبات تے انہاں دے ماءپیو کوں خوشی دے ایں لمحے اچ تاڑیاں وجاونڑ دی اجازت ہوونڑیں چاہیدی اے ،انہاں آکھیا اج دی تقریب اچ طالبات جتنی وڈی تعداد اچ میڈل گھدن ہک طرح انہاں طالب علماں کوں ناک آﺅٹ کر ڈتے اتے اے انہاں سانگے لمحہ فکریہ اے ،گورنر پنجاب مزید آکھیا جو طلباءتے طالبات کوں میں نصیحت کرینداں جو او اپنڑے والدین دا ہمیشہ احترام کرن تے والدین دے بعد استاداں دا وی احترام کرن ،انہاں آکھیا ایں وقت دنیا اچ ساریں توں ودھ تعلیم تے صحت تے توجہ ڈتی ویندی پئی اے تے حکومت دی توجہ وی انہاں ڈو شعبیں تے ہے ۔ایںموقع تے وائس چانسلر نشترمیڈیکل یونیورسٹی ڈاکٹر مصطفی کمال پاشا ، استاداں تے ،ڈاکٹرز تے طالب علماں دی وڈی تعداد موجود ہئی ۔
