دورہ چین بہوں اہم اتے امیداں نال بھریا اے،وزیراعظم عمران خان

اسلام آباد ۔ یکم نومبر (اے پی پی) وزیراعظم عمران خان اپنڑے دورہ چین کوں اہم اتے امیداں بھریا قرار ڈیندے آکھیے جو دورہ چین بہوں اہم اتے امیداں نال بھریا اے،سعودی عرب توں بعد متحدہ عرب امارات اتے چین توں وی چنگیاں خبراں ملسن،مختلف شعبیاں اچ چین دے تجربیاں توں فیدہ چیسوں،آئی ایم ایف دو ونجنڑا وی پیا تاں ودھ قرض گھنڑ دی لوڑھ نہ پوسی،اساں نئیں چاہندے جو عوام تے کوئی بیا بھار پووے۔ دورہ چین روانگی توں پہلے اسلام آباد اچ چینی میڈیا دے نمائندیاں نال گالھ مہاڑ اچ انہاں دورہ چین دی اہمیت اتے پاکستان دیاں ترجیحات اتے مختلف شعبیاں اچ تعاون سانگے لوڑھاں بارے تفصیلی ڈسایا۔ وزیراعظم عمران خان دا آکھنڑ ہا جو بدعنوانی ماتے غربت مکاونڑ، بہتر اسلوب حکمرانی، زراعت دی بہتری سودھے مختلف شعباں اچ چین دے تجربات توں سکھنڑ اتے فیدہ چاونڑ دا موقع ملسی کیوں جو جگ اچ چین دی ترقی دا ماڈل نویکلا اے اتے ساکوں چین جھیں ترقی دی لورھ اے ایں سانگے سی پیک دی تیکھے تکمیل،اقتصادی زونز، ڈو طرفہ تجارت، معاشی گانڈھا،زراعت و صنعت دی ترقی کیتے طویل المدتی اہداف تے کم کرنر دی لورھ اے۔وزیراعظم آکھیا جو منصب سنبھالنڑ توں بعد دورہ سعودی عرب دے پچھو چین دا دورہ وی بہوں اہم اے، امید اے جو ایندے نال ڈوہاں ملکاں وچال سنگت اتے تعاون دی نویں راہ نکلسی۔انہاں آکھیا جو چین تیزی نال ترقی کرنڑ آلی ڈوجھی وڈی معیشت اے، غربت، دہشتگردی، بدعنوانی مکاونڑ اتے بااثر لوکاں کوں سزائیں ڈیونڑ اچ چین بہوں کامیابی گھدی اے، ایں سانگے چین نال ساجھے داری بہوں اہم ثابت تھیسی۔انہاں آکھیا جو شنگھائی اچ تھیونڑ آلی نمائش اچ پاکستان پویلین دا قیام ہک وڈا موقع ہوسی، سی پیک دے ڈوجھے مرحلہ نال پاکستان اچ سرمایہ کاری آسی اتے چین توں ٹیکنالوجی ٹرانسفر تھیسی،اساں برآمدات دا ودھاراکرنڑ کیتے بہوں محنت کریندے پئے ہیں،سستے گھر، زراعت اتے تکنیکی تعلیم سودھے ماہی گیری دے شعبہ اچ چین توں مدد گھنسوں۔