اسلام آباد ۔ 30 نومبر (اے پی پی) وفاقی حکومت دسمبر کیتے پیٹرولیم مصنوعات دا مل گھٹاونڑ دا اعلان کر ڈتے۔نویاں قیمتاں دے مطابق پٹرول اتے ڈیزل دا مل ڈو روپے فی لیٹر،مٹی دا تیل ترائے روپے اتے ہائی سپیڈ ڈیزل پنج روپے فی لٹر تئیں سستا کرڈتا گئے۔ اے اعلان وزیر خزانہ اسد عمر ،وفاقی وزیرمنصوبہ بندی،ترقی واصلاحات مخدوم خسروبختیار اتے وزیرمملکت محاصلات (ریونیو) حماد اظہردے کٹھے ہک پریس کانفرنس اچ کیتے۔ وزیر خزانہ دا آکھنڑ ہا جو حکومت صارفین کوں ودھ توں ودھ سہولتاں اتے سوکھ ڈیونڑ دی پالیسی تے چلدی پئی اے، ساڈی کوشش اے جو عوام کوں جتنا تھی سگے ریلیف ڈیووں اتے بار گھٹ توں گھٹ سٹیا ونجے۔ وزیرخزانہ اسدعمرآکھیا جو اکتوبر اچ پٹرولیم مصنوعات دیاں قیمتاں 84 توں 85 ڈالرتئین پج گیاں ہن، ساکوں جتنی قیمت ودھاونڑی ہئی اساں اوندے مقابلے ادھی قیمت ودھائی جیندے کیتے پٹرولیم ڈویلپمنٹ لیوی اتے سیلز ٹیکس اچ کمی کرنڑاں پئی۔