چیئرمین سینیٹ محمد صادق سنجرانی دی اومان دے مفتی اعظم شیخ احمد بن حماد الخلیلی نال ملاقات، دورہ پاکستان دی دعوت ڈتی

مسقط ۔ 22 نومبر (اے پی پی) چیئرمین سینیٹ محمد صادق سنجرانی اومان دے مفتی اعظم شیخ احمد بن حماد الخلیلی نال ملاقات کیتی ایں موقع تے چیئر مین سینیٹ دے وفد دے ارکان وی موجود ہن ۔ ملاقات اچ اومان دے مفتی اعظم مسلم اُمہ سانگے پاکستان دی خدمات تے حمایت دی تعریف کریندے ہوئیں آکھیا جو پاکستان مسلم ملکاں اچ اہم مقام رکھیندے تے امن دے ودھارے ترقی تے خوشحالی اتے اتحاد سانگے پاکستان دا کردار مثالی اے تے مستقبل اچ ایں طرح دے تعمیری تے ٹھوس کردار ادا کریندا رہ ویسی ۔ مفتی اعظم عالمی امن اتے خوشحالی سانگے بلا تفریق ڈائیلاگ دے ودھارے تے زور ڈتا ایں موقع تے مفتی اعظم پاکستان دے نال اپنڑی قربات دا ذکر کریندے ہوئیں آکھیا جو پاکستان نال انہاں داتعلق چار دہائیاں تے محیط اے ۔ چیئرمین سینیٹ مفتی اعظم دی بصیرت اتے مفکرانہ خدمات دی تعریف کیتی اتے آکھیا جو اسلامی دنیا تے خاص طور تے پاکستان دے نال تعاون کوں ودھارا ڈیونڑ اچ انہاں ہمیشہ موثر کردار ادا کیتے ۔ وفاقی وزیر سائنس و ٹیکنالوجی سینیٹر محمد اعظم خان سواتی ،سینیٹر زکلثوم پروین ، مولا بخش چانڈیو ، دلاور خان، حاجی مومن خان آفریدی اتے سپیشل سیکرٹری سینیٹ محمد انور وی دورے اچ چیئرمین سینیٹ دے رلے ہن ۔ پاکستانی وفد دے سربراہ مفتی اعظم کو ں پاکستان دے دورے دے دعوت ڈتی ۔