کراچی اچ چین دے قونصلیٹ تے حملے اچ باہرلیاں طاقتاں ملوث ہن ، پاک چین تعلقات بہوں گھاٹے ہن ایجھے واقعات نال ایندے تے اثرکائناں پوسی ، پاکستان دی فوج تے قانون نافذ کرنڑ آلے اداریں امن سانگے قربانیاں ڈتن وفاقی وزیر اطلاعات و نشریات چوہدری فواد حسین دا چائنیز کمیونٹی دی شہداءپولیس دے اہل خانہ سانگے فنڈ ریزنگ تقریب نال خطاب

اسلام آباد ۔ 26 نومبر (اے پی پی) وفاقی وزیر اطلاعات و نشریات چوہدری فواد حسین آکھیے جو کراچی اچ چین دے قونصلیٹ تے حملے اچ باہرلیاں طاقتاں ملوث ہن ،اساکوں پتہ ہے جو حملہ کیں کیتے تے حملے دے پچھوں کون اے ،اے پوری دنیا جانڑدی اے ،دنیا اے وی جانڑدی اے جو پاکستان امن دے پاسے ہتھ ودھارے تے کون امن کائنی چاہندا،پاک چین تعلقات بہوں گھاٹے ہن تے ایجھے واقعات نال تعلقات تے اثر کائناں پوسی ، پاکستان دی فوج اتے قانون نافذ کرنڑ آلے اداریں امن سانگے قربانیاں ڈتن ، پاکستان دی دھی اے ایس پی ، پولیس اتے سکیورٹی گارڈز جیویں چینی قونصلیٹ دی حفاظت کیتی قابل فخر اے ۔او سنوار کوں اتھاں چائنیز کمیونٹی ولوں شہدا پولیس دے اہل خانہ سانگے شروع کیتی ونجنڑ آلی فنڈ ریزنگ تقریب نال خطاب کریندے پے ہن۔ چین دے ڈپٹی ہیڈ آف مشن یاﺅ لی جین دے علاوہ وفاقی دارالحکومت اچ رہائش پذیر چائنیز تریمت ، مرد، نینگر ، طالب علماں، کاروبار نال منسلک چین دے شہریاں دی وڈی تعداد ایں موقع تے موجود ہئی ۔تقریب نال خطاب کریندے ہوئیں وفاقی وزیر اطلاعات و نشریات چوہدری فواد حسین آکھیا جو کراچی اچ چینی قونصلیٹ تے حملے اچ ملوث کون اے ساریں کوں پتہ اے ۔انہاں آکھیا اساں ایں طرح دیاں مصیبتاں دا مقابلہ کرنڑ جانڑدوں ،ایوب خان دے دورتوں پاکستان تے چین دے تعلقات ہن ایندے بعد آونڑ آلی حکومت اپنڑاں حصہ پا تا ،چین دے نال سٹریٹجک تعلقات دے علاوہ دفاعی تے معاشی رشتہ وی ہے جیرھا جودنیا کوں کھڑکدے ۔انہاں آکھیا دہشت گردی دے خلاف اتنی لمبی جنگ دے باوجود پاکستانی قوم ثابت قدم اتے مستقل مزاج ہے، پاکستان صوفیاءاتے امن دی دھرتی اے ۔انہاں آکھیا جو پاکستانی قوم 5 ہزار سال پرانڑیں تاریخ دی امین اے ۔انہاں آکھیا پاکستان اچ رہنڑ آلے چائنیز کمیونٹی رضا کارانہ طور تے کراچی قونصلیٹ شہداءسانگے فنڈ ریزنگ دا اہتمام کیتے ، پوری دنیا اچ رہنڑ آلے چین نال تعلق رکھنڑ آلے شہری فنڈز ریزنگ کریندے پن۔بعد اچ وفاقی وزیر اطلاعات و نشریات چوہدر ی فواد حسین تقریب اچ شریک چین دے شہریاں نا ل ملاقات کیتی تے شہیداں سانگے ایں جذبے دا شکریہ ادا کیتا ۔