اسلام آباد ۔ 23 نومبر (اے پی پی) وفاقی وزیر خزانہ اسد عمرجمعے کوں قومی اسمبلی اچ ذاتی نکتہ وضاحت تے اظہار خیال کریندے ہوئیں آکھیے جو آئی ایم ایف دے نال معاہدہ وختی ،مشکل یا کہیں دے دباﺅ اچ آتے کائناں کریسوں ،اساکوں کوئی وختی یا پریشانی کائنی اساں متبادل انتظامات کر گھدن ،آئی ایم ایف نال معاہدہ ملک دے مفادات کوں سامنڑے رکھ تے کیتا ویسی ‘ سی پیک منصوبے دے خلاف میں ماضی اچ کڈاہیں بیان کائنی ڈتا ، البتہ میں درآمدی کولیں دے ٹیرف دے حوالے نال نظرثانی دی درخواست ڈتی‘ نیپرا میڈے موقف کوں تسلیم کیتا ‘ اصل یوٹرن تاں قائد حزب اختلاف گھدے جنہاں ماضی اچ بطور وزیراعلیٰ آکھیا ہئی جو آصف علی زرداری کوں سڑکاں تے گھلیساں تے کھمبے تے لڑکیساں ، مسلم لیگ (ن) دے دور حکومت اچ غریب دے استعمال دے ڈیزل تے 101 فیصد ٹیکس لاتا گیا اساں پنج گناہ ٹیکس گھٹائے ۔انہاں آکھیا ایوان دے تقدس دی گال کرنڑ آلیں پنج سال اچ کڈاہیں ایوان کوں اعتماد اچ کائنی گھدا ۔ جمہوریت دے درس تاں بہوں ملدن ۔ایں ایوان اتے جمہوریت دا تقدس اوں وقت بلند تھیندے جڈاں وڈے فیصلیں تے ایوان کوں اعتماد اچ گھدا ونجے ۔میڈے سی پیک دے خلاف ہک بیان دی مثال وی کائنی ڈتی ونج سگدی ۔
