اسلام آباد ۔ 15 نومبر (اے پی پی) وزیر مملکت داخلہ شہریار آفریدی آکھیے جو خیبرپختونخوا دے ایس پی طاہر خان داوڑ شہید کوں 26 اکتوبر کو ںاسلام آباد توں اغواءکیتا گیا ، انہاں کوں پہلے وی دھکمیاں ملدیاں پیاں ہن ،انہاں دے اہل خانہ دھمکیاں ملنڑ پاروں اسلام آباد منتقل تھی گے ہن ، وزیراعظم انہاں کوں شہید کرنڑ دے واقعے دی انکوائری رپورٹ منگی اے ،ایں واقعے دے مجرم افغانستان اچ ہوون یا پاکستان اچ انہاں کوں نشان عبرت بنڑایا ویسی ،اسلام آباد اچ سیف سٹی منصوبے دے 600توں ودھ کیمرے کم ہی نئی کریندے پئے ۔ایں منصوبے دی مکمل تحقیقات کرائیاں ویسن ۔ خمیس کوں ایوان بالا اچ پالیسی بیان ڈیندے ہوئیں شہریار آفریدی آکھیا جو طاہر داوڑ دی شہادت دا واقعہ بہوں دل سوز تے تکلیف دہ اے تے ایندے نال قانون نافذ کرنڑ آلے ادایں دی استعداد ودھاونڑ تے خاص طور تے پولیس دے حوالے نال سوالیہ نشان ابھر تے سامنڑے آندے ، طاہر خان داوڑ شہید پاکستان دے غیرت مند پتر ہن، انہاں تے پہلے وی ڈو واری خود کش حملے تھن ،انہاں دی جان کوں اتنا خطرہ ہئی او ست سال خیبر پختونخوا توں باہر رہ گن تے 2017اچ انہاں دا خاندان منتقل تھی تے بارہ کہو آگیا انہاں دے ہک بھرا تے بھابھی کوں وی شہید کر ڈٹا گیا، 26 اکتوبر کوں سوا چھی وجے او جی ٹین اچ ہک شادی دی تقریب اچ پجے ہن ، 7 وج تے 45 منٹ تے انہاں دے بھرا فرحان احمد الدین داوڑ تھانہ رمنا اسلام آباد اچ رپورٹ درج کرائی، 28 اکتوبر کوں ایف آئی آر درج کیتی گئی، اے ہک حساس معاملہ ہا انہاں دا آپنڑیں اہل خانہ کوں جیرھا پیغام ملیا ایندے اچ انہاں آکھیا جو ”میں محفوظ ہاں اتے تساں پریشان نہ تھیوو “13 نومبر تئیں انٹیلی جنس ایجنسیاں اتے قانون نافذ کرنڑ آلے ادارے تحقیقات کریندے رہیے، 13 نومبر کو ںپہلی واری میت دی تصویر سامنڑے آئی، اوں وقت تئیں کوئی مصدقہ خبر یا اطلاع کائناں ہئی ایں سنگے کہیں حتمی نتیجے تے کائناں پج سگدے ہاسے ، 14 نومبر کو ںافغان حکومت طاہر داوڑ شہید دی خبر دی تصدیق کیتی ۔ انہاںآکھیا جو وزیراعظم عمران خان خیبرپختونخوا دے وزیر اعلیٰ، آئی جی خیبرپختونخوا اتے آئی جی اسلام آباد توں وختی طور تے انکوائری رپورٹ منگ گھدی اے ۔انہاں آکھیا جو پاکستان اتے افغانستان وچال ہک دشوار گزار سرحد ہے اتے افغانستان دے پاسے کوئی پیٹرولنگ دا طریقہ کار وی کائنی ، ایندے تے اساں کئی واری گال وی کیتی اے ۔انہاں آکھیا جو اسلام آباد اچ سیف سٹی منصوبے دے تحت 1800کیمرے لاتے گن لیکن ہک وی کیمرے اچ اتنی صلاحیت کائنی جو او نمبرپلیٹ یا گاڈیاں اچ سوار لوکاں بارے کوئی معلومات ڈے سگے حالانکہ 95فیصد رقم تاں ایم او یوز دستخط کریندے ہی جاری کر ڈتی گئی ہئی ،ایں وقت وی 600توں ودھ کیمرے کم کائناں کریندے پئے ہن ۔انہاں آکھیا جو ایس پی طاہر داوڑ شہید کو ںاغواءکرنڑ دے بعد پہلے پنجاب گھن گئے ڈو ڈینھ بعد براستہ میانوالی انہاں کوں بنوں پجایا گیا ۔انہاں آکھیا جو ایندے توں پہلے وی پاکستان دے اندر توں کجھ نینگراں کوں چاتا تے افغانستان پجایا گے ولا انہاں دیاں لاشاں ملیاں ۔انہاں آکھیا اساں ایں گال دے حق اچ ہوں جو ایواناں اچ پولیس، ایف آئی اے اتے قانون نافذ کرنڑ آلے اداریں بارے بحث تھیونڑیں چاہیدی اے ، چیئرمین سینٹ سیف سٹیز دے ناں تے کیمریں دی تنصیب دے معاملے دی تحقیقات دا حکمہ جاری کرن، وزارت داخلہ وی ایں سلسلے اچ تحقیقات کرویسی ۔کیں کیں ایں منصوبے اچ کک بیکس تے فائدے چاتن ۔انہاں آکھیا طاہر داوڑ شہید پاکستان دے پتر ہن تے سارے پاکستانیاں دے جان تے مال دی محافظ ریاست اے ،اے وقت اتحاد دا مظاہرہ کرنڑ دا ہے، پاکستان کوں عدم استحکام توں جیرھے لوک ڈو چار کرنڑ چاہندن انہاں کوں وی اے پیغام ڈیونڑاںاے جو اساں ہک ہوں ۔ انہاں آکھیاجو مجرم چاہے پاکستان اچ ہووے یا افغانستان اچ اساں انہاں کوں نشان عبرت بنڑیسوں۔
