اسلام آباد ۔ 19 نومبر (اے پی پی) وفاقی وزیرصحت محمد عامر کیانی آکھیے جو وزیرِ اعظم عمران خان دی حکومت ملک توں پولیو دے خاتمے سانگے پر عزم اے ،پولیو دا خاتمہ انہاں دی وزارت دی ترجیح اچ شامل اے تے پاکستان کوں پولیو توں پاک ملک بنڑاونڑ سانگے ہر ممکن کوشش کیتی ویسی ،اے گال انہاں سنوار کوں اتھاں جاپان حکومت، جاپان دی بین الاقوامی تعاون دی ایجنسی (JICA) اتے یونیسف ولوں امداد دی فراہمی دے سلسلے اچ دستاویزات تے دستخط کرنڑ دی تقریب اچ آکھی ۔ انہاں ایں موقع تے جاپان دی حکومت تے بئے شراکت داراں دا شکریہ ادا کیتا جیں دیاں کاوشاں نال پاکستان پولیو دے خاتمے دے نیڑے پج گئے ۔انہاں آکھیا جو جاپانی حکومت پولیو ویکسین دی خریداری سانگے پاکستان کوں 510ملین جاپانی ین دی امداد ڈیسی اے رقم 2018-19دے دوران ایں وقت استعمال اچ گھن آئی ویسی۔انہاں آکھیا ایں موقع تے دستاویز تے جاپان حکومت، جاپان دی بین الاقوامی تعاون دی ایجنسی (جائیکا) اتے یونیسف دستخط کریندے ہوئیں دستاویزات دا سانجھا تبادلہ کیتے ۔جاپان دی حکومت دے عزم دا اعتراف کریندے ہوئیں پولیو دے تدراک سانگے وزیراعظم دے فوکل پرسن بابر بن عطا آکھیا جو سالاں توں جاپان دی حکومت تے عوام اساڈے نال ہر اوکھے وقت اچ رلے کھڑن ۔ایں موقع تے پاکستان اچ جاپان دے سفیر تے مقتدرِ اعلیٰ تاکاشی کورائی گا ل کریندے ہوئیں آکھیا جو پولیو دراصل صحت عامہ دا ہک عالمگیر مسئلہ ہے اتے انسان کوں معذوری نال ڈو چار کرنڑ آلی ایں بیماری کوں صرف ویکسین دی مدد نال روکیا ونج سگدے ۔انہاں آکھیا جو پاکستان کو ں پولیو توں پاک کرنڑ سانگے جاپان دی امداد جاری رہسی ۔ پاکستان اچ یونیسف دی ڈپٹی نمائندہ مس کرسٹین منڈیٹ ایں موقع تے گال کریندے ہوئیں آکھیا جو جاپان ولوں اے امداد اوں وقت ڈتی ویندی پئی اے جڈان پاکستان اچ پولیو وائرس دی گردش کوں روکنڑ سانگے سرتوڑ کوششاں کیتیاں ویندیاں پن ۔میکوں اعتماد اے جو حکومت پاکستان تے بئے شراکت دار دی مسلسل حمایت نال اساں بہوں وختی پولیو وائرس دے مکمل خاتمے اچ کامیاب تھی ویسوں۔
