نیویارک ۔ 22 نومبر (اے پی پی)پاکستان اقوام متحدہ کوں وزیر اعظم عمران خان ولوں توہین مذہب دے خلاف عالمی مہم دے آغاز دے حوالے نال ڈسیندے ہوئیں آکھیے جو دنیا دے سارے ملکاں کوں مذہب اتے انہاں نال رلیے مقدست ہستیاں دی توہین روکنڑ سانگے جامع اقدامات کرنڑیں ہوسن ۔ اقوام متحدہ اچ پاکستان دے سفارتی مشن توں جاری ہک بیان اچ آکھیا گے جو اقوام متحدہ اچ پاکستان دی مستقل مندوب ڈاکٹر ملیحہ لودھی یونائٹڈ نیشنز الائنس آف سویلائزیشن دے اٹھویں گلوبل فورم نال خطاب کریندے ہوئیں آکھیے جو وزیراعظم عمران خان دنیا دے مختلف حصیں اچ مذہب اتے مقدس ہستیاں دی توہین دے سد باب دے حوالے نال اہم قدم چاونڑ دا اعلان کیتے ۔انہاں آکھیا دنیا دے کجھ حصیں اچ نفرت تے مبنی بیانیے کھنڈائے ویندے پن ،اسلام فوبیا کھنڈدا پئے تے تنوع کوں ہک خطرہ قرار ڈتا ویندا پئے تے اینویں لگدے جو امید دی سیاست دی جاہ ڈر دی سیاست گھندی پئی اے ۔ایں صورت حال تے قابو پاونڑ کیتے پل دا کردار ادا کرنڑ آلے اتے امن پسند اں دا کردار وی اہمیت رکھیندے ۔انہاں آکھیا جو مسلماناں دے خلاف مغربی دنیا دیاں کجھ جہیں تے منفی پراپیگنڈا نفرت انگیز اندازاچ کھنڈایا ویندا پئے ۔انہاں آکھیا پاکستان دی حکومت برداشت اتے درگزر کو ں ودھارا ڈیونڑ تے عالمی امن و سلامتی دے حوالے نال عالمی سطح تے کیتیاں ونجنڑ آلیاں سنجیدہ کوششاں تے گال مہاڑ تے یقین رکھیندی اے
