اسلام آباد ۔ 20 نومبر (اے پی پی) سینیٹ آف پاکستان اتے اومان دی کونسل آف اسٹیٹ دے وچال ڈو پاسے مفاہمت دی یاداشت تے دستخط کیتے گن جیں دا مقصد ڈوہیں پارلیمان وچال پارلیمانی تعاون اتے ادارہ جاتی رابطے کوں مزید مستحکم بنڑاونڑ اے ۔ معاہدے تے چیئرمین سینیٹ محمد صادق سنجرانی اتے اومان دی اسٹیٹ کونسل دے چیئرمین ڈاکٹر یحییٰ بن محفوظ المنتری دستخط کیتے۔ ایں سلسلے اچ تھیونڑ آلی ملاقات دے دوران اومان دی سٹیٹ کونسل دے چیئر مین آکھیا جو معاہدے توں پہلے توں موجود ڈو طرفہ رابطے کوں مزید مربوط بنڑاونڑ اچ مدد مل ویسی ۔انہاں آکھیا جو اومان دی 48ویں قومی ڈینھ دی تقریبات دے موقع تے چیئر مین سینیٹ محمد صاد ق سنجرانی دا اے دورہ بہوں اہمیت رکھیندے ۔ایں موقع تے چیئرمین سینیٹ دی سربراہی اچ پارلیمانی وفد اومان دی اسٹیٹ کونسل دے ارتقائی سفر توں متعلق ہک دستاویزی فلم وی ڈٹھی جیں اچ ایندے اختیارات تے آئین سازی متعلق آگاہی دا موقع ملیا ۔ ملاقات دے دوران ڈوہیں ایواناں وچال قانون سازی اتے بئے اہم شعبیں دے ودھارے تے اتفاق کیتا گیا ۔ چیئرمین سینیٹ محمدصادق سنجرانی ایں موقع تے گال مہاڑ کریندے ہوئیں آکھیا جو اساں ڈوہیں ملکاں وچال تعاون کوں مزید موثر بنڑاونڑ چاہندوں ۔