وزیراعظم عمران خان دا کراچی اچ چینی قونصل خانے اتے لوئر اورکزئی ایجنسی اچ دہشت گرد حملیں دی ودھ ساری مذمت کریندے ہوئیں قیمتی انسانی جاناں دے ضیان تے ڈکھ تے افسوس دا اظہار کیتے،اے واقعہ پاک چین اقتصادی تے سٹریٹیجک تعاون دے خلاف سازش دا حصہ اے، واقعے دی پوری تحقیقات دا حکم

اسلام آباد ۔ 23 نومبر (اے پی پی) وزیراعظم عمران خان کراچی اچ چینی قونصل خانے اتے لوئر اورکزئی ایجنسی اچ دہشت گرد حملے دی ودھ ساری مذمت کریندے ہوئیں قیمتی جاناں دے ضیان تے ودھ سارے ڈکھ تے افسوس دا اظہار کیتے ۔جمعے کوں جاری بیان اچ وزیراعظم عمران خان کراچی اچ چینی قونصل خانے دے باہروں فائرنگ دے واقعے دی ودھ ساری مذمت کریندے ہوئیں ایندی پوری تحقیقات دا حکم ڈے ڈتا ۔ وزیراعظم آکھیا ایں افسوسناک واقعہ دے پس پردہ عناصر کوں بے نقاب کیتا ویسی ۔اے واقعہ پاک چین اقتصادی اتے سٹریٹیجک تعاون دے خلاف سازش دا حصہ اے تاں جو ایں قسم دے واقعات نال پاک چین تعلقات کوں او متاثر کائنی کر سگدے ۔انہاں آکھیاپاک چین دوستی ہمالیہ توں اچی تے بحیرہ عرب توں وی جھکی اے ۔ وزیراعظم آکھیا جو کراچی پولیس تے رینجرز غیر معمولی جرات دا مظاہرہ کیتے ۔ انہاں آکھیا قوم شہیداں تے انہاں دے رفقائے کار کوں جرات اتے بہادری دا مظاہرہ کرنڑ تے خراج تحسین پیش کریندی اے جیں تے اساکوں فخر اے ۔ وزیراعظم لوئر اورکزئی ایجنسی اچ دہشت گردی دے حملے دی وی مذمت کریندے ہوئیں شہیداں دے درجات دی بلندی دی دعا کیتی تے ڈکھی ٹبر نال ہمدردی دا اظہار کیتا ۔وزیراعظم زخمیاں کوں بہترین طبی سہولتاں دی فراہمی دی ہدایت کیتی ۔ایندے علاوہ وزیراعظم اپنڑے ہک ٹویٹ اچ آکھیا جو اے گال میں تے نہایت واضح ہے جو چینی قونصل خانے اتے لوئر اورکزئی ایجنسی اچ اے حملے سوچی سمجھی مہم دا حصہ ہن جیں دا مقصد انہاں عناصر ولوں ملک اچ بے چینی پیدا کرنڑ اے جیرھا جوخوشحال پاکستان نئی ڈیکھنڑ چاہندے ۔ وزیراعظم آکھیا جو کہیں دے ذہن اچ کوئی شبہ نی ہوونڑاں چاہیدا جو اساں دہشت گرداں کوں ہر قیمت تے چکل ڈیسوں ۔انہاں آکھیا اے دہشت گرد اپنڑے مذموم مقصد اچ کامیاب کائناں تھیسن ۔