بیجنگ ۔ 2 نومبر (اے پی پی) وزیر اعظم عمران خان جیہڑے چین دے پنج ڈینہہ دے دورہ تے بیجنگ اچ ہین، انہاں چین دے صدر شی جن پنگ نال ملاقات کیتی جیندے اچ سی پیک تے پیشرفت اتے کامیابیاں تے اطمینان کریندے ہوئیں ہک بئے دے ودھ توں ودھ فیدے کیتے سی پیک دی تیکھے تکمیل دا عزمکیتے جڈاں جو باہمی دلچسپی دے علاقائی و عالمی امورتے گالھ مہاڑوی کیتی گئی، ایں سانگے ودھدی سیاسی و اقتصادی بے یقینی تے رل مل تے قابو پاونڑ تے اتفاق کیتاگئے۔وزیراعظم عمران خان ملاقات اچ یقین ڈیوائے جو پاکستان باہمی مفادات و تصورات، کثیر الجہتی نظام دے ودھارے کیتے چین دے نال اے اتے اساںچین کولوں تخفیف غربت اتے انسداد بدعنوانی دے تجربیاں توں سکھنڑ چاہندے ہیں۔ایں موقع تے چین دے صدر نویں دور اچ مشترکہ مستقبل کیتے پاک۔چین تزویراتی معاون شراکت داری ودھاونڑ دا عزم کریندے ہوئے بنیادی مفاد سانگے پاکستان دی ہر ممکن حمایت دا یقین ڈیوائے اتے وزیراعظم عمران خان ولوںدورہ پاکستان دی دعوت وی قبول کر گھدی اے۔پیپلز گریٹ ہال اچ ملاقات دے دوران وزیر اعظم عمران خان پرجوش جذبات اتے شاندار مہمان نوازی تے چینی صدر، چین دی حکومت اتے عوام دا شکریہ اداکیتے۔وزیراعظم عمران خان انہاں کوں ”اصلاحات اور کشادگی“دی 40 ویں سالگرہ تے مبارک ڈتی اتے آکھیا جو چین نال سنگت پاکستان دی خارجہ پالیسی دا اہم جزو اے، ڈو طرفہ تعلقات بئے پکے کیتے ویسن،امید اے جو صدر شی جن پنگ دا ”بیلٹ اینڈ روڈ“ وژن اتے فلیگ شپ منصوبہ سی پیک خطہ اتے باہرو ہر کہیں کیتے فیدہ مند ثابت تھیسی۔چینی صدروزیراعظم عمران خان کوں انتخابات اچ جیت اتے منصب سنبھالنڑ تے مبارک ڈتی اتے آکھیا جو او پاک۔چین سٹرٹیجک معاون شراکت داری سانگے عمران خان رل تے ٹرنڑ چاہندن،ایندے نال ڈوہاںملکاں ہی نئیں پورے خطہ کوں فیدہ ملسی۔وزیر خارجہ شاہ محمود قریشی، وزیر خزانہ اسد عمر، وزیر ریلوے شیخ رشید احمد، وزیر برائے منصوبہ بندی خسرو بختیار، وزیراعظم دے مشیر برائے تجارت عبدالرزاق اتے وزیراعلیٰ بلوچستان جام کمال وی وزیراعظم دے نال ہن۔
