اسلام آباد ۔ 9 نومبر (اے پی پی) وزیراعظم عمران خان آکھیے جو پاکستانی قوم دے اگو کوئی شے ناممکن کائنی،ساکوں اللہ سارے وسائل نال رجائے، مادر وطن کوں او ملک بنڑیسوں جیندا خواب شاعر مشرق علامہ اقبال ڈٹھا ہا۔اے گالھ انہاں یوم اقبال دے موقعے تے قوم دے ناویں اپنڑے ہک ویڈیو سنیہے اچ آکھی۔وزیراعظم آکھیا جو اقبال دا فلسفہ ہک سمندر اے،اقبال جیہرے شاہین دا فلسفہ پیش کیتے او اینجھا انسان اے جیہڑا اپنڑی ذاتی اناءاتے خوف توں ذہنی طورتے آزادتھی تے باقی لوکاں توں عظیم بنڑ ویندے،اقبال دا شاہین او لوک ہن جنہاں کوں پیغمبراسلام حضرت محمدﷺ آزاد کیتے اتے ول او عظیم بنڑن،انہاں دے اگو وڈیاں وڈیاں طاقتاں گوڈے ٹیک ڈتن، انہاں اینجھی ریاست دی بنیاد رکھی جیں ہک نویں تہذیب دی شکل اچ پورے جگ تے راج کیتے۔وزیراعظم آکھیے جو اقبال دے فلسفے دے مطابق ساکوں عقل دی غلامی توںا ٓزاد تھیونڑے،جڈاں انسان اچ عشق اتے جنون آویندے تاں او نامکمن کوں وی ممکن کر ڈکھیندے اتے ول کتھائیں رُکدا نئیں۔وزیراعظم علامہ اقبال دے شعر دے مصرعہ ”ستاروں سے آگے جہاں اور بھی ہیں“ دا حوالہ ڈیندے آکھیے جو اللہ اپنڑی مخلوق کوں بہوں طاقت ڈتی اے،او ازمیندا وی اے اتے اگو تے وی ودھیندے تاں جو او اپنڑی منزل دو ودھدا راہوے،پیارے نبیدے صحابہ کرامؓ گھٹ تعداد دے باوجودبے مثال کارنامے کیتن جیکوں اج وی تاریخ منیندی اے۔ وزیراعظم پاکستانی قوم کوں یوم اقبال تے سنیہا ڈتے جو او اقبال دا خواب پورا کرن جیہڑا انہاں سب توں اچا کرنڑ دا ڈٹھا ہا۔وزیراعظم آکھیا جو ساڈے رہنما قائداعظم اتے علامہ اقبال عظیم لوک ہن ، ہک ملک دا سوچئے اتے بئے او کر ڈکھائے اتے اج اساںا ٓزاد ہیں،اساں ایکوں اوہو ملک بنڑاونڑے جیہڑا بنڑنا چاہیدا ہا، اساں ہک عظیم قوم ہیں اتے اساں انشاءاﷲ عظیم قوم بنڑسوں۔
