کراچی۔ 20 نومبر (اے پی پی) پاک فضائیہ دے سربراہ ایئر چیف مارشل مجاہد انور خان جیرھے جو پاکستان اسکواش فیڈریشن دے صدر وی ہن انہاں مصحف اسکواش کمپلیکس اسلام آباد اچ منعقد تھیونڑ آلے برٹش اوپن اتے یو ایس اوپن اسکواش چیمپئن شپ دیاں تیاریاں دے سلسلے اچ جاری تربیتی کیمپ دا دورہ کیتا۔ پاک فضائیہ ولوں منگل کو ں اتھاں جاری ہک اعلامیے دے مطابق ایئر چیف کھلاڑیاں نال گال مہاڑ کریندے ہوئیں انہاں کوچاں دی سخت محنت دی تعریف کیتی ۔ انہاں نینگر کھلاڑیاں کوں یاد کرویندے ہوئیں آکھیا جو اسکواش دی عظمت رفتہ کوں پاونڑ سانگے سخت محنت تے جدوجہد کوں جاری رکھنڑاں ہوسی ۔ سربراہ پاک فضائیہ کھلاڑیاں دے معیار کوں بہتر بنڑاونڑ سانگے تربیتی کیمپ دے وختی انعقاد تے پاکستان اسکواش فیڈریشن دیاں کاوشاں دی تعریف کیتی ۔ایندے توں پہلے سینئر نائب صدر پاکستان اسکواش فیڈریشن ایئر مارشل شاہد اختر علوی ایئر چیف کو ں پلیئرز ڈولپمنٹ پروگرام اتے جاری تربیتی کیمپ بارے بریفنگ وی ڈتی ۔
